Azərbaycan, Bakı, 02 oktyabr / Trend müxbir S.Kazımlı/ Azərbaycan paytaxtının Nardaran qəsəbə sakinlərinin ABŞ-ın ölkəmizdəki səfirliyi qarşısında planlaşdırılan piketi baş tutmayıb.
Trend -un məlumatına görə, Nardaran kənd sakini Rasim Əlizadə hazırladıqları qətnaməni ABŞ səfirliyinin nümayəndəsinə təqdim etdiyindən, sonradan piketçilərin səfirlik qarşısına gəlməmələrinə dair razılıq əldə olunub.
Qətnamədə ABŞ-ın Azərbaycandakı keçmiş səfiri Stenli Eskuderonun Nardaranda əldə etdiyi torpaq sahəsilə bağlı araşdırma aparılması tələb olunur.
Qətnamədə məhkəmənin Eskuderoya torpaq sahəsinin verilməsi ilə bağlı ədalətsiz qərarının ləğv edilməsi və amerikalı diplomatın himayədar və havadarlarının cəzalandırılması tələb olunur.
Trend -un arayışı: Nardaran qəsəbəsinin bir qrup sakini ABŞ-ın Azərbaycandakı keçmiş səfiri Eskuderonu onların torpaqlarını ələ keçirməkdə ittiham edir. Qəsəbə sakinləri bildirirlər ki, keçmiş səfir nardaranlılara məxsus olan 30 hektar sahəyə iddia edir. Nardaranlılar həmçinin bildiriblər ki, bu torpaqların Cəbrayıl Salmanov adlı birinə məxsus olması haqda məhkəmə qərarı var, onun qızı Nigar isə Eskuderonun gəlinidir. Lakin qəsəbə sakinləri iddia edirlər ki, bu torpaqlar heç vaxt Salmanova məxsus olmayıb. Indi işə Ali Məhkəmənin Plenumunda baxılır.
Məqalə müəllifi ilə əlaqə ünvanı: [email protected]