Təfərrüatlar əlavə olunub (İlk xəbər 11:38-də yayılıb)
Azərbaycan, Şamaxı, 15 fevral / Trend müxbir M.Əliyev/
Azərbaycanda "Hüquqi şəxslərin cinayət məsuliyyətinə cəlb edilməsi haqqında" qanun layihəsi parlamentə təqdim edilib. Trend-in məlumatına görə, bunu "Azərbaycan Respublikasında korrupsiyaya qarşı mübarizə: nailiyyətlər və perspektivlər" mövzusunda Vergilər Nazirliyinin Şamaxı rayonunda yerləşən Tədris Mərkəzində keçirilən konfransda çıxışı zamanı Prezident Administrasiyasının Hüquq mühafizə orqanları ilə iş şöbəsinin müdiri Fuad Ələsgərov bildirib.
Ələsgərov deyib ki, bu, bir neçə konvensiyadan irəli gələn qanundur.
"Bütün Avropa ölkələri bu qanunu qəbul edib və artıq bir sıra MDB ölkələri də bu qanunu qəbul edirlər. Xüsusilə Baltikyanı ölkələr, Moldova, Gürcüstan, Qazaxstan və Rusiya belə bir qanun üzərində işləyirlər", - o deyib.
Ələsgərov qeyd edib ki, hazırlanan qanunun müzakirəsi davam etdiriləcək, çünki nəzəri baxımdan problemlər var.
PA rəsmisi bildirib ki, şəffaflığın daha da artırılması, dövlət orqanlarının açıqlığının, vətəndaş iştirakçılığının təmin edilməsi məqsədi ilə korrupsiyaya qarşı Milli Strategiya çərçivəsində Milli Fəaliyyət Planının hazırlanması barədə işlər həyata keçirilir.
Onun sözlərinə görə, sənədlərin layihəsi ilə bağlı təkliflərin müzakirəsi üçün yaxın zamanda geniş ictimai müzakirələrin keçirilməsi planlaşdırılır.
"Ümid edirik ki, Beynəlxalq Antikorrupsiya Akademiyası bu sənədin hazırlanması və icrasına da kömək edəcək", - Ələsgərov əlavə edib.
PA rəsmisi bildirib ki, Beynəlxalq Antikorrupsiya Akademiyasının əsas istiqamətlərindən biri BMT-nin korrupsiya əleyhinə konvensiyasının icrasına dəstəkdir. Azərbaycan bu konvensiyaya qoşulan ilk dövlətlərdən biridir və bu istiqamətdə bütün zəruri islahatları həyata keçirir.
"Beynəlxalq Antikorrupsiya Akademiyası ilə əməkdaşlıq Azərbaycanda bu istiqamətdə həyata keçirilən tədbirlərin səmərəsinin və icra keyfiyyətinin artırılmasına töhvə verə bilər", - Ələsgərov əlavə edib.
Onun sözlərinə görə, Azərbaycan iqtisadi baxımdan dinamik inkişaf edən dövlətdir. Ölkənin inkişafını şərtləndirən amillərdən biri də korrupsiya qarşı mübarizə sahəsində həyata keçirilən məqsədyönlü, qətiyyətli siyasətdir.