Bakı. Trend:
“Ocaq Sport” klubunun bədii gimnastika üzrə birinciliyindəki uğurumda məşqçimin əməyi böyükdür.
Bu barədə çərşənbə günü Trend-ə yarışda uşaqlar (2013-2015-ci il təvəllüdlü) yaş kateqoriyası üzrə birinci yer tutmuş Əminə Novruzova deyib.
10 yaşlı Əminə Novruzova 2013-cü il təvəllüdlü gimnastlar arasında yarışıb və onun sözlərinə görə, rəqibləri güclü olub.
"Birinclik üzrə yarışda rəqiblərim güclü idilər, lakin mən daha yaxşı nəticə göstərə bildim. Başda həyəcanlı olsam da, sonradan özümü toparladım, bütün elementləri yadıma saldım və birinci yeri tutdum. Topla və gürzlə iki hərəkət nümayiş etdirdim. Məndə gürzlə proqram daha yaxşı alınır, onunla daha çox çalışmışam, topla hərəkət proqramına isə nisbətən sonradan başlamışam", - deyə İxtisaslaşdırılmış Olimpiya Ehtiyatları Uşaq-Gənclər Gimnastika Məktəbinin yetirməsi qeyd edib.
Gimnastın sözlərinə görə, o, gələcəkdə beynəlxalq turnirlərdə çıxış etmək arzusundadır.
"Ölkəmi beynəlxalq yarışlarda layiqincə təmsil etmək arzusundayam. Həmçinin, gələcəkdə məşqçi fəaliyyəti ilə məşğul olmaq, bədii gimnastikaya sevgi aşılamaq istəyirəm", - deyə o əlavə edib.
Qeyd edək ki, 4-5 aprel tarixlərində Bakı Olimpiya İdman Kompleksində “Ocaq Sport” klubunun bədii gimnastika üzrə 2-ci açıq birinciliyi keçirilir.
Yarışda “Ocaq Sport” klubu, “Abşeron OİK”, “Ağdaş” OİK, “İOEUG” Gimnastika Məktəbi, “Gəncə” OİK, “Ocaq Sport” klubunun Hövsan bölməsi, “Şağan” OİK, “Grasiya” İK və “Sumqayıt” OİK “Qusar” OİK, “Kür” Olimpiya Tədris İdman Mərkəzi, “Qax” OİK, “RKİM”, “Şəmkir” Gənclər Evi, “Su İdman Sarayı” və “Zirə” Mədəniyyət Mərkəzi Eko-Park-dan 340 gənc gimnast iştirak edir.
Birincilikdə gimnastlar fərdi proqramla yanaşı, qrup hərəkətləri
proqramı ilə çıxış edirlər.
Yarışlar balacalar (2016-2017-ci il), uşaqlar (2013-2015-ci il),
yeniyetmələr (2011-2012-ci il), gənclər (2008-2010-ci il) yaş
kateqoriyaları üzrə keçirilir.