Bakı. Trend:
2012-2023-cü illər ərzində Avropa İttifaqının (Aİ) Azərbaycanda investisiyalarının ümumi həcmi 24,7 milyard ABŞ dolları olub.
Trend xəbər verir ki, bu barədə iqtisadiyyat nazirinin müşaviri Rauf Nəcəfli Avropa İttifaqı (Aİ) tərəfindən maliyyələşdirilən və Dünya Bankı tərəfindən idarə olunan AZTAF üzrə ikinci illik hesabat iclasında deyib.
"Aİ ilə əməkdaşlıq Azərbaycanın xarici siyasətində mühüm yer tutur. İkitərəfli münasibətlərin artan dinamikası şəraitində ticarət qarşılıqlı fəaliyyətin əsas istiqamətlərindən biri olaraq qalır. Azərbaycan da öz növbəsində avropalı investorlar üçün cəlbedici bazardır. Belə ki, 2023-cü ildə Azərbaycanın xarici ticarətində Aİ-nin payı 24,82 milyard ABŞ dolları olub, bu ilin yanvar-aprel aylarında isə bu göstərici 5,31 milyard ABŞ olub. 2012-2023-cü illər ərzində Aİ-nin Azərbaycandakı investisiyalarının ümumi həcmi 24,7 milyard ABŞ dolları olub", - o deyib.
R.Nəcəflinin fikrincə, Azərbaycanın Aİ və Dünya Bankı ilə müxtəlif proqram və layihələr çərçivəsində iqtisadi inkişafın təmin olunmasında və innovativ yanaşmaların adaptasiyasında mühüm rol oynayır.
"Mühüm geosiyasi məkanda yerləşən Azərbaycan regional və qlobal səviyyələrdə, o cümlədən, beynəlxalq təşkilatlar və onların institutları ilə səmərəli əməkdaşlıq edir, o cümlədən, bu əlaqələrin daimi inkişafı və möhkəmləndirilməsi üçün lazımi səylər göstərir.
Biz ikitərəfli və çoxtərəfli münasibətlərin artan dinamikası və dünya iqtisadiyyatına yüksək inteqrasiyası fonunda aparıcı beynəlxalq təşkilatlarla əməkdaşlığı yüksək qiymətləndirir, etibarlı və təşəbbüskar tərəfdaş olaraq bunda fəal iştirak edirik. Xüsusən vurğulamaq istərdim ki, Aİ və Dünya Bankı ilə müxtəlif proqram və layihələr çərçivəsində əməkdaşlıq iqtisadi inkişafın təmin edilməsində və innovativ yanaşmaların adaptasiyasında mühüm rol oynayır", - deyə o əlavə edib.
(Tərcümə: Rəna Əbdürəhmanova)