...

Dünya Bankı Özbəkistana yardım üzrə yeni strategiyanı təsdiqləyib

Biznes və iqtisadiyyat xəbərləri Materials 16 İyun 2008 15:13 (UTC +04:00)

Özbəkistan, Daşkənd, 16 iyun/ Trend müxbir T.Jukov/ Dünya Bankı (DB) Özbəkistan hökuməti ilə razılaşdırmadan sonra Özbəkistana yardım üzrə yeni strategiya qəbul edir. DB-nin Daşkənd nümayəndəliyindən Trend agentliyinə verilən məlumata görə, yeni strategiya baza sosial xidmətlərin yaxşılaşdırılması və əhalinin həyat səviyyəsinin artırılmasına yönəlib.

Dünya Bankının yaydığı press-relizdə bildirilir ki, Özbəkistan üçün yeni strategiya 2008-ci ildən 2011-ci ilədək dövr üçün nəzərdə tutulub. DB-nin planlarına əsasən, ildə ən azı üç dövlət investisiya layihəsinə maliyyə yardımı göstərmək nəzərdə tutulur. Dünya Bankının özəl sektor üçün kredit bölməsi olan Beynəlxalq Maliyyə Korporasiaysının yardımı ilə biznesin dəstəklənməsi həyata keçiriləcək.

2011-ci ildə aşağıdakı sahələrdə "nəzərə çarpacaq nəticələr" əldə etmək nəzərdə tutulur: iqtisadi artım üçün şəraitin yaradılması; kənd regionlarının əhalisi üçün gəlirlərin və iqtisadi imkanların artırılması; səhiyyə, təhsil və su təchizatında əhaliyə təqdim olunan xidmətlərin keyfiyyətinin artırılması; işgüzar mühitin yaxşılaşdırılması. Bundan əlavə, ətraf mühitin və "təbii fəlakətərin risklərinin idarə edilməsi"nin səmərəliliyinin artırılmasına səy göstəriləcək.

"Bizim məqsədimiz Özbəkistan əhalisinin həyat səviyyəsinin artırılmasıdır", - Dünya Bankının Mərkəzi Asiya üzrə regional direktoru Annet Dikson bildirib. "Hökumət və vətəndaş cəmiyyəti ilə geniş məsələhətləşmələrdən sonra biz əminik ki, bankın maliyyə və məsləhət xarakterli dəstəyi nəticə verəcək. Məsləhətləşmələr zamanı hökumət bankın yeni strategiya çərçivəsində təklif etdiyi prioritet yardım istiqamətlərinə dair prinsipial razılığını bildirib", - o bildirib.

Özbəkistan 1992-ci ildə Dünya Bankının üzvü olub. DB-nin respublikadakı missiyası hökumətin keçirdiyi iqtisadi islahatlarda iştirak etməklə əhalinin həyat səviyyəsinin yaxşılaşdırılması, sosial sektorun təkmilləşdirilməsində dəstəyin həyata keçirilməsi və Özbəkistan hökumət və əhalisinə bilik və təcrübənin verilməsinə yönəlib. Özbəkistanın Dünya Bankına münasibətdə öhdəliklərinin ümumi həcmi $650 mln. təşkil edir.

Müəlliflə əlaqə saxlamaq üçün elektron ünvan: [email protected]

Xəbər lenti

Xəbər lenti