Azərbaycan, Bakı, 22 oktyabr/ Trend , müxbir İ.Xəlilova/ "Azərbaycan iqtisadiyyatının dinamik inkişafına uyğunluq üçün 2013-cü ilədək respublikaın yeni Vergi Məcəlləsini hazırlamaq planlaşdırılır", - Vergilər Nazirliyinin Vergi Siyasəti və Strateji Araşdırmalar Baş İdarəsinin rəisi Mirdaməd Sadıqov idarə nəzdində yaradılmış ekspert komissiyasının birinci iclasında bildirib.
Onun sözlərinə görə, Kodeksin hazırlanmasında ekspert komissiyası, daha dəqiqi, vergi inzibatçılığı, vergi siyasəti və vergi qanunvericiliyi sahəsində yaradılmış işçi qrupları aparıcı rol oynayacaq. Nazirlikdə işçi qrupları ilə fəaliyyətin uzlaşdırılması üçün hər bir şərait yaradılıb.
Azərbaycanın Vergi Məcəlləsi 2000 - ci il iyulun 11-də təsdiq edilib və 2001-ci il yanvarın 1-də qüvvəyə minib. Lakin hər il büdcə prosesi çərçivəsində, Məcəlləyə düzəlişlər edilir.
Ekspert komissiyası 2008 - ci ilin avqustunda, Azərbaycanda sosial - iqtisadi inkişafın sürətlənməsi fonunda, vergi sisteminin təkmilləşdirilməsi üzrə tədqiqatların aparılması və tövsiyələrin hazırlanması məqsədilə yaradılıb.
Komissiyanın vəzifələrinə sosial, iqtisadi və ekoloji problemlərin yaxşılaşdırılması üçün vergi sisteminin rolunun qiymətləndirilməsi və imkanlarının tədqiqi, bu sahədə təkliflərin hazırlanması və qarşılıqlı vergi münasibətlərinin tənzimlənməsi üzrə hazırlanmış layihələrin ekspert qiymətləndirməsinin aparılması daxildir.
Komissiyanın əsas fəaliyyət istiqamətlərinə vergi daxilolmalarının artırılması sahəsində proqnozlara ekspert rəyinin verilməsi, vergi sisteminin sadələşdirilməsi, o cümlədən müvafiq idarəçilik strukturlarının təkmilləşdirilməsi və bu istiqamətdə beynəlxalq təcrübənin ümumiləşdirilməsi ilə vergi orqanlarının səmərəli fəaliyyətinin təmin olunması üçün təkliflərin hazırlanması daxildir. Komissiya vergi yükünün təhlili və onun optimallaşdırılması, Vergi Ombudsmanı institutunun təkmilləşdirilməsi, Ölkənin sərmayə cəlbediciliyinin artırılmasında vergi siyasətinin rolunun araşdırılması üzrə təkliflər hazırlayacaq.
Müəlliflə əlaqə saxlamaq üçün elektron ünvan: [email protected]