Azərbaycan, Bakı, 11 sentyabr /Trend/
Azərbaycan Mərkəzi Bankında (AMB) növbəti strateji dövr üzrə korporativ strateji planın hazırlanması prosesinə başlanılıb.
Bankdan Trend-ə verilən məlumata görə, dünyada ən mütərəqqi mərkəzi bankçılıq fəaliyyətlərini bençmark seçərək missiyasına effektiv nail olan, bununla cəmiyyətin rifahına xidmət edən, müasir menecmentə, inkişaf etmiş insan kapitalına, yüksək korporativ dəyərlərə və mədəniyyətə malik etibarlı, şəffaf və modern dövlət təsisatı olmaq əzmində olan Mərkəzi Bank korporativ strateji idarəetmə sistemini 2001-ci ildən etibarən tətbiq edir. Mərkəzi Bankın uzunmüddətli strateji idarəetmə praktikasının davamını təşkil edən yeni strateji plan sayca 5-cidir. Yeni korporativ strateji plan qabaqcıl beynəlxalq təcrübəyə əsaslanan strateji təhlil və planlaşdırma metodologiyası əsasında hazırlanır.
Yeni strateji planlaşdırma prosesinin ilkin mərhələsini AMB-nin bütün funksiyaları və biznes proseslərini əhatə edən strateji təhlil mərhələsi təşkil edir. Strateji təhlil prosesində Mərkəzi Bankın rəhbərliyi, bütün struktur bölmələri, menecment heyəti və aparıcı əməkdaşları birbaşa iştirak edirlər. Təhlil beynəlxalq təcrübəyə əsaslanan metodologiya əsasında aparılır və Mərkəzi Bankın missiyası, funksiyaları, biznes prosesləri, pul siyasəti və bank quruculuğu, iqtisadi siyasət və korporativ idarəetmə üzrə işin cari vəziyyəti, yeni strateji dövr üzrə strateji baxışı, daxli və xarici mühitin və çağırışların təhlilini və yeni dövr üzrə strateji baxışa nail olmaq üçün icrası tələb olunan strateji təşəbbüslərin müəyyənləşdirilməsini əhatə edir.
Qəbul olunmuş metodologiyaya uyğun olaraq, strateji təhlil prosesinin nəticələri əsasında müəyyənləşdirilən strateji təşəbbüslər daha sonra qabaqcıl beynəlxalq təcrübəyə uyğun olaraq proqram və layihə idarəetməsi çərçivəsində icra edilir. Həmçinin bu çərçivədə strateji proqram və layihələrin icrası prosesinin mütəmadi monitorinqi, qiymətləndirilməsi və hesabatlılığı təşkil olunur. Yeni strateji planın cari ilin sonunadək hazırlanması nəzərdə tutulur. Bu çərçivədə cari strateji planın icra vəziyyətinin qiymətləndirilməsi də aparılacaq.
Eyni zamanda, Mərkəzi Bank 2011-2014-cü illəri əhatə edən cari strateji planının icrasını uğurla yekunlaşdırmaqdadır. Makroiqtisadi sabitliyin qorunması, bank sistemində maliyyə sabitliyinin qorunması, əsas missiyaya xidmət edən funksiyaların əsaslı müasirləşdirilməsi, institusional idarəetmənin ən müasir praktikaya uyğunlaşdırılması, Mərkəzi Bankın insan kapitalının inkişafı və iqtisadi inkişafa dəstəyin artırılması bu dövrün əsas strateji prioritetlərini təşkil edib.