Azərbaycan, Bakı, 22 oktyabr/ Trend , müxbir S.Babayeva/ "2009- cu ildə Azərbaycanda ölkənin efir məkanını müdafiə etməyə imkan verəcək milli radiomonitorinq sistemi fəaliyyətə başlayacaq", - Azərbaycanın Rabitə və İnformasiya Texnologiyaları Nazirliyi Dövlət Radiotezliklər İdarəsinin (DRİ) rəhbəri Əflatun Məmmədov bildirib.
"İşlər üç mərhələdə baş tutacaq. Bu gün biz ikinci mərhələdəyik. Layihə üzrə zəruri sənədlərin hazırlanmasını başa çatdırmış və artıq sistemin quraşdırılması işlərinə başlamışıq", - Məmmədov bildirib.
Onun sözlərinə görə, işlərin üçüncü mərhələsi - şəbəkənin qurulması üçün avadanlığın quraşdırılması tender vasitəsilə yerinə yetiriləcək.
Sistemin işə salınması tezliklərdən səmərəli istifadəni, elektron vasitələrin qeydiyyatı və uçotunu, qeydiyyatdankənar qanunsuz istifadənin qarşısının alınmasını, efir məkanına nəzarəti, efirə müdaxilənin qarşısının alınmasını təmin edəcək.
Layihənin ilkin dəyəri 20 mln. manat qiymətləndirilir. Maliyyələşdirməni dövlət büdcəsi və DRİ - nin daxili vəsaitləri hesabına, həmçinin, texniki kreditlər cəlb etməklə həyata keçirmək planlaşdırılır.
Ölkədə radiomonitorinq sisteminin yaradılması layihəsi Rabitə Nazirliyinin 2009 - cu ilə prioritet layihələrinin siyahısına daxil edilib.
Müəlliflə əlaqə saxlamaq üçün elektron ünvan: [email protected]