Rusiya, Moskva, 15 may / Trend müxbir R.Ağayev/ Bu gün biz Heydər Əliyevin anadan olmasının 85 illiyini qeyd edirik. Həqiqətən də o görkəmli dövlət xadimi və müdrik siyasətçidir. Heydər Əliyevin xatirəsini həm Rusiya, həm Azərbaycan və digər ölkələrdə yad edirik. Onilliklər ərzində Heydər Əliyev çoxlu sayda yüksək dövlət postlarını tutub. Həm Rusiya, həm də Azərbaycan öz nailiyyətlərinə görə Heydər Əliyevə borcludurlar. Belə bir bəyanatla Moskvada Azərbaycan xalqının ümummilli lideri Heydər Əliyevin anadan olmasının 85 illiyinə həsr olunmuş təntənəli xatirə gecəsində Rusiya prezidenti administrasiyasının rəhbəri Sergey Narışkin çıxış edib.
Heydər Əliyevin xatirə gecəsi və konsert Rusiya hökuməti, Moskva meriyası, Heydər Əliyev Fondu, İTAR-TASS agentliyi və Azərbaycanın Moskvadakı səfirliyinin dəstəyi ilə keçirilib.
Serqey Narışkin qeyd edib ki, müasir Azərbaycanın nailiyyətləri, dövlətçiliyin möhkəmlənməsi, köklü iqtisadi və sosial islahatların keçirilməsi əsasən Heydər Əliyevin xidmətləridir. Onun sözlərinə görə, məhz Heydər Əliyev tərəfindən Azərbaycanda ölkənin inkişafı və beynəlxalq nüfuzunun artırılması üçün möhkəm fundament qoyulub.
Rusiya prezidenti administrasiyasının rəhbəri xüsusi olaraq Heydər Əliyevin Rusiya və Azərbaycan xalqları arasındakı dostluğun möhkəmlənməsi, habelə Rusiya və Azərbaycanın strateji tərəfdaşlığının formalaşdırılmasına verdiyi töhfəni qeyd edib. "Məhz Azərbaycan liderinin möhkəm və prinsipial siyasəti ölkələrimizin və xalqlarımızın qarşılıqlı tərəfdaşlığı üçün yeni imkanlar açdı. Odur ki, Rusiya-Azərbaycan əlaqələrinin möhkəmlənməsinə xüsusi töhfə verdiyi üçün Heydər Əliyev Rusiyanın ən yüksək mükafatı olan Müqəddəs Apostol Andrey Pervozvannıy Ordeninə layiq görüldü", - deyə o vurğulayıb.
Narışkinin sözlərinə görə, bu gün Heydər Əliyevin işini onun oğlu, Azərbaycan prezidenti İlham Əliyev layiqincə davam etdirir. Onun fikrincə, əsas odur ki, İlham Əliyev iki ölkənin xalqları arasındakı dostluğun tərəfdaşıdır. "Hələ 90-cı illərin ortalarında Heydər Əliyev deyirdi ki, həm Rusiya, həm də Azərbaycan dostluq əlaqələrinə ehtiyac duyurlar və sevindiricidir ki, Heydər Əliyevin dedikləri indi birgə səylərlə həyata keçirilir. Son illər əlaqələrimiz daha da möhkəmlənir və yaxınlaşır. Ölkələrimizin rəhbərləri daima intensiv və konstruktiv siyasi dialoq aparırlar. Ticarət dövriyyəsi artmaqdadır, mədəni və humanitar əlaqələrimiz genişlənməkdədir. Ancaq əsas odur ki, biz dostluq və etibarlıq ənənələrimizi qiymətləndiririk", - deyə Narışkin bildirib.
O həmçinin əlavə edib ki, Rusiya və Azərbaycanın tərəfdaşlığı, iki ölkə arasındakı əməkdaşlığın möhkəmləndirilməsi, regional və beynəlxalq məsələlərdə konstruktiv tərəfdaşlıq iki ölkənin milli maraqlarına tamamilə cavab verir. "Biz Heydər Əliyevə onun Rusiyaya və xalqımıza xoş münasibətinə görə minnətdarıq. Heydər Əliyevin xatirəsi, onun asan olmayan həyat yolu daima ürəyimizdə olacaq, bu görkəmli siyasətçini tanıyan və ona hörmət edənlərin yaddaşlarında həkk olunacaq", - deyə Narışkin tamamlayıb.
Narışkin həmçinin bildirib ki, Rusiya prezidenti Dmitri Medvedev Azərbaycan Prezidentinin İcra Aparatının rəhbəri Ramiz Mehdiyevin Rusiya və Azərbaycan arasında dostluq və qonşuluq əlaqələrinin inkişafına verdiyi böyük töhfəyə görə Dostluq Ordeni ilə təltif edilməsi barədə fərman imzalayıb.