Azərbaycan, Bakı, 06 iyun/ Trend , müxbir E.Babayev/ Azərbaycanda Seçki Məcəlləsinə edilən əlavə və dəyişikliklərlə bağlı Konstitusiya Məhkəməsinə olunacaq şikayətə digər müxalifət partiyaları qoşulmayıb. "Müraciəti öz adımdan hazırlayıram", cümə günü Trend -a Azərbaycan Naminə İctimai Forumun rəhbəri, prezident seçkisinə bitərəf namizəd kimi qatılacağını bəyan edən Eldar Namazov bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. Parlament bazar ertəsi Seçki Məcəlləsinə əlavə və dəyişiklikləri qəbul edib. Yeni layihəyə görə, prezidentliyə namizədlərin depozit qoyma şərti götürülür. Namizədlər yalnız imza toplayacaqlar. Namizədliyin qeydə alınması üçün tələb olunan 45 min imzanın isə 40 minə endirilməsi nəzərdə tutulur. Bundan əlavə, seçki təbliğatı 120 gündən 75 günə endirilir. Məcəllədə dövlət televiziyasında namizədlərə pulsuz efir vaxtı ayrılması qadağan edilib.
Namazov bildirib ki, şikayət ərizəsini Konstitusiya Məhkəməsinə təqdim etmək üçün yeni layihənin ölkə prezidenti tərəfindən təsdiqlənməsini gözləyir. "Bizim hüquqşünaslar şikayət ərizəsi üzərində işi tamamlamaq üzrədir. Ərizədə bir neçə məsələ yer alıb. Əsas məsələlərdən biri dövlət televiziyasında (AzTV) seçki təbliğatının ləğv olunması və bundan sonra namizədlərə yalnız İctimai Televiziyada (İTV) pulsuz efir vaxtının ayrılmasıdır. AzTV bütün ölkə ərazisində yayımlanır. Ancaq İTV ölkə ərazisinin təqribən 60 faizində yayımlanır. Bu isə o deməkdir ki, milyonlarla seçici namizədlərin debatlarına, çıxışlarına baxa bilməyəcəklər", - deyən Namazov əlavə edib ki, indiki halda birbaşa Konstitusiya Məhkəməsinə müraciət etmək mümkündür. Çünki seçki kampaniyasının başlanmasına az qalıb və vaxt baxımından aşağı məhkəmə instansiyalarına bu şikayəti etmək mümkün deyil. Belə müstəsna hallarda qanunvericilik birbaşa Konstitusiya Məhkəməsinə müraciət etmək hüququ verir.
Məqalə müəllifi ilə əlaqə ünvanı: [email protected]