Azərbaycan, Bakı, 11 oktyabr / Trend , müxbir C.Babayeva/ Hakim Yeni Azərbaycan Partiyası (YAP) prezident seçksini müşahidə edən beynəlxalq təşkilatların hesabatlarında obyektivlik meyarının qorunacağına əmindir.
"Beynəlxalq təşkilatlar və onların təmsilçiləri Azərbaycanda həyata keçirilən siyasəti və onun uğurlarını, seçki ilə bağlı keçirilən tədbirlərin nəticələrini yüksək qiymətləndirirlər. Bu, bizə onu deməyə əsas verir ki, növbəti hesabatlarda da obyektivlik meyarı qorunacaq" - Trend - un məlumatına görə, YAP - ın icraçı katibi Əli Əhmədov şənbə günü partiyanın rəsmi saytına verdiyi müsahibəsində bildirib.
Trend - un arayışı: Azərbaycanda prezident seçkisi oktyabrın15-də keçiriləcək. Prezident seçkisində yeddi namizəd - Yeni Azərbaycan Partiyasının (YAP) sədri, indiki dövlət başçısı İlham Əliyev, müxalif Ümid Pariyasının sədri İqbal Ağazadə, Böyük Quruluş Partiyasının sədri Fazil Qəzənfəroğlu, Bütöv Azərbaycan Xalq Cəbhəsi Partiyasının sədri Qüdrət Həsənquliyev, Müasir Müsavat Partiyasının sədri Hafiz Hacıyev, Azərbaycan Liberal Demokrat Partiyasının sədri Fuad Əliyev və müstəqil namizəd Qulamhüseyn Əlibəyli iştirak edəcək.
ATƏT-in Demokratik Təsisatlar və İnsan Haqları Bürosunun Azərbaycanda seçkiqabağı vəziyyətə dair son hesabatında ölkədə sakitliyin hökm sürdüyü əks olunub və bildirilib ki, prezidentliyə namizədlərin seçki platformaları ciddi fərqlənmir.
Azərbaycanda seçkinin gedişatını 59 ölkədən 1104 beynəlxalq müşahidəçi izləyəcək. Mərkəzi Seçki Komissiyası tərəfindən ən böyük missiyalar Avropa Şurası, ATƏT, MDB - dən qeydə alınıb.
Əhmədov Azərbaycanda keçiriləcək prezident seçkilərini uzunmüddətli müşahidə etmək üçün ATƏT, MDB və digər beynəlxalq təşkilatların müşahidəçilərinin apardıqları müşahidələrin nəticələri ilə bağlı hesabatlarını xüsusi razılıq hissi yaratdığını bildirib.
"Artıq həmin təşkilatların iki hesabatı açıqlanıb. Həmin hesabatlarda Azərbaycanda seçkilərin normal demokratik şəraitdə keçirilməsi üçün münbit şəraitin yaradıldığı qeyd olunur. Bu, onu göstərir ki, beynəlxalq təşkilatlar tərəfindən Azərbaycana olan inam daha da artır, ölkəmizin əhəmiyyəti yüksəlir", - deyə YAP - ın icraçı katibi qeyd edib.
O, Azərbaycanda keçiriləcək prezident seçkiləri ilə bağlı beynəlxalq təşkilatların və Avropa strukturlarının hazırlayacaqları rəy və hesabatların müsbət olacağına inam yaratdığını deyib.
"Biz indiyə qədər keçirilən seçkilərlə bağlı bir sıra beynəlxalq təşkilatların hazırladıqları hesabatlarda obyektivliyin kifayət qədər gözlənilməməsindən öz nigarançılığımızı bildirirdik. Hesab edirəm ki, beynəlxalq təşkilatlar və onların təmsilçiləri Azərbaycanda həyata keçirilən siyasəti və onun uğurlarını, seçki ilə bağlı keçirilən tədbirlərin nəticələrini yüksək qiymətləndirirlər", - deyə Əhmədov əlavə edib.
Trend - un arayışı: Yeni Azərbaycan Partiyası 1992 - ci ildə, o vaxt Naxçıvan Ali Məclisinin sədri olan Heydər Əliyev tərəfindən yaradılıb. Azərbaycanda 1993 - cü ildən hakim partiya olan YAP - ın indiki sədri prezident İlham Əliyevdir.
Məqalə müəllifi ilə əlaqə saxlamaq üçün ünvan: [email protected]