Azərbaycan, Bakı, 15 oktyabr/ Trend , müxbir E.Tariverdiyeva/ Saat 15.00 - a Sankt-Peterburqda Azərbaycan prezidenti seçkilərində iki məntəqədə seçicilərin təxminən 60 faizi səs verib, - Azərbaycanın Sankt-Peterburqdakı Baş konsulu Qüdsi Osmanov telefonla Trend -a bildirib.
"Seçkilər normal keçir. Çox xoşdur ki, insanlar ailələri ilə səsverməyə gəlir, gənclərin sayı çoxdur", - Osmanov bildirib.
Sankt-Peterburqda müvəqqəti yaşayan və Azərbaycanın bu ölkədəki səfirliyinin konsulluq bölməsi tərəfindən qeydə alınmış 21000 Azərbaycan vətəndaşının 1317 nəfəri səs verib. Baş konsulluqda səs verənlər arasında seçki günü Sankt-Peterburqda işgüzar səfərdə olan Azərbaycanın müdafiə naziri Səfər Əbiyev də olub. Əbiyev MDB ölkələrinin müdafiə idarələri rəhbərlərinin iclasında iştirak edir.
Bu gün Azərbaycan prezidenti seçkisi keçirilir. Prezident seçkisində yeddi namizəd - Yeni Azərbaycan Partiyasının (YAP) sədri, hazırkı dövlət başçısı İlham Əliyev, müxalif Ümid Pariyasının sədri İqbal Ağazadə, Böyük Quruluş Partiyasının sədri Fazil Qəzənfəroğlu , Bütöv Azərbaycan Xalq Cəbhəsi Partiyasının sədri Qüdrət Həsənquliyev, Müasir Müsavat Partiyasının sədri Hafiz Hacıyev, Azərbaycan Liberal Demokrat Partiyasının sədri Fuad Əliyev və müstəqil namizəd Qulamhüseyn Əlibəyli iştirak edir.
Müəlliflə əlaqə saxlamaq üçün elektron ünvan: [email protected]