Azərbaycan, Bakı, 24 may / Trend, müxbir M.Əliyev/
Avropa Şurasında hazırlanacaq "siyasi məhbus" anlayışının meyarları yalnız AŞPA-ya gələcək fəaliyyətlərində kömək etməyəcək, həmçinin bütövlükdə hüquq elminə bir töhfə olacaq. Bu barədə Trend-ə Azərbaycanın AŞPA-dakı nümayəndə heyətinin üzvü Rəfael Hüseynov bildirib.
AŞPA-nın Hüquqi İşlər və İnsan Hüquqları Komitəsinin mayın 21-də Parisdə keçirilən iclasında "Siyasi məhbuslar məsələsinə yenidən baxılması" mövzusunda məruzələrin bölünməsi qərara alınıb. Məruzələr bu məsələ ilə bağlı obyektivlik nümayiş etdirilməsi və məsələnin həlli istiqamətində real irəliləyişlərə nail olunması üçün siyasi məhbusların izlənilməsi və "siyasi məhbus" anlayışının müəyyən edilməsi meyarlarını açıqlayacaq.
"Əgər biz meyarları müəyyən etsək - həm də bu meyarlar Komitə səviyyəsində deyil, Parlament Assambleyası səviyyəsində müzakirə edilərək təsdiq olunmalıdır - o zaman bu yalnız AŞPA-ya gələcək fəaliyyətlərində kömək etməyəcək, həmçinin bütövlükdə hüquq elminə bir töhfə olacaq. Çünki "siyasi məhbus" anlayışının hüquq elmində bu günə qədər dəqiq tərifi, müəyyən edilmiş konkret meyarları yoxdur", - Hüseynov deyib.
Deputat qeyd edib ki, bunu müəyyən etmək də son dərəcə çətindir.
"Ona görə ki, "siyasi məhbus" ifadəsinin özündə təzad, qəlizlik, mürəkkəblik görünməkdədir. "Siyasi" sözü siyasəti ifadə edir, "məhbus" anlayışı isə hüquq elmini. Hüquq elmi konkret faktlara, dəqiq parametrlərə əsaslanır, siyasət isə təbii ki, daha yayğın, daha mücərrəd bir təfərrüatı özündə ehtiva edir", - o bildirib.
Eyni zamanda, Hüseynov qeyd edib ki, qəbul olunan qərar Azərbaycanın bir dövlət olaraq, siyasi iradəsinin, gücünün Avropa Şurası tərəfindən qəbul olunması və təsdiqidir.