Azərbaycan, Bakı, 26 may /Trend/
28 May - Respublika Günü münasibətilə Pakistanda keçirilən möhtəşəm tədbir ölkənin nüfuzlu qəzetləri olan "Pakistan Observer", "The News", "Daily Times", "The Nation" və "Daily Jang" qəzetlərinin 26 may tarixli saylarında, həmçinin PTV, DRY News, CNBC və digər yerli kanallarda geniş işıqlandırılmışdır.
Azərbaycanın Pakistandakı səfirliyindən Trend-ə verilən məlumata görə, qəbulda iştirak etmiş pakistanlı jurnalistlər tədbir barədə öz təəssüratlarını oxucularla bölüşərək qeyd etmişlər ki, Azərbaycanın zəngin mədəniyyəti, mətbəxi, musiqisi, incəsənəti burada öz əksini tapmışdır.
Mərasimə qatılan nüfuzlu qonaqlar - Pakistanın inkişaf və idarəetmə, daxili işlər, ticarət nazirləri, Pakistan Sənaye Ticarət Palatasının Prezidenti, Senatın və Milli Assambleyanın sədr müavinləri, Milli Assambleyanın deputatları, senatorlar, Pakistan ordusunun generalları, tanınmış dövlət və hökumət adamları, ziyalılar, jurnalistlər, xarici ölkələrin Pakistandakı səfirləri, diplomatlar müstəqil Azərbaycanın nailiyyətləri ilə bir daha tanış olmuşlar. Xüsusilə, Pakistanın bir sıra əhəmiyyətli nazirlərinin və dövlət xadimlərinin Respublika Günü münasibətilə qeyd olunan mərasimə qatılmasını Pakistanın qardaş Azərbaycana göstərmiş olduğu diqqətin bariz nümunəsi olduğu qəzetlərdə vurğulanmışdır.
Qəzetlərdə, həmçinin Azərbaycanın beynəlxalq tədbirlərdə fəal iştirak etdiyi, müstəqil olduğu 20 il ərzində dünya miqyaslı uğurlara imza atdığı ifadə olunmuşdur.
Mətbuatda Azərbaycan və Pakistan arasında münasibətlərin dərin tarixi-mədəni köklərə malik olduğu, ortaq mədəniyyət və adət-ənənələrin, həmçinin Böyük İpək Yolu vasitəsi ilə aparılan ticarətin iki xalq arasında körpü rolu oynadığı, Pakistanda məşhur "Qaf dağı pəriləri" nağıllarının, Azərbaycandakı Multan sarayının iki xalq arasındakı dostluq münasibətlərinin təzahürü olduğu oxuculara çatdırılmışdır.
Təsadüfi deyil ki, Sovet işğalına baxmayaraq Pakistan və Azərbaycan xalqı bir-birini unutmamış, Azərbaycan müstəqil olduqdan dərhal sonra ikitərəfli münasibətlər sürətlə inkişaf etmişdir. Hal-hazırda Azərbaycanla Pakistan demək olar ki bütün taleyüklü məsələlərdə eyni mövqedən çıxış edirlər.
Məlumatlarda zəngin Azərbaycan yeməklərinin, ifa olunan saz musiqisinin qonaqları olduqca məmnun etdiyi vurğulanmışdır.
Xəbəri aşağıdakı linkdən əldə etmək olar:
http://pakobserver.net/detailnews.asp?id=157161