Azərbaycan, Bakı, 27 may /Trend/
Son aylar "Human Rights Wateh" və "Amnesty International" təşkilatlarının intensiv xarakter daşıyan antiazərbaycan kampaniyasına Avropa Parlamentinin də qatılması təəssüf və təəccüb doğurmaya bilmir. Trend-in məlumatına görə, bu barədə Ana Vətən Partiyasının bəyanatında deyilir.
"Erməni lobbisi tərəfindən maliyyələşdirilən və təşkil olunan antiazərbaycan kampaniyaları ölkəmizə şər, böhtan və iftiralar yağdırmaqda davam edir. Respublikamızın güclənməsi, dövlətçiliyimizə və milli maraqlarımıza xidmət edən müstəqil xarici siyasətimizin verdiyi uğurlu nəticələr Azərbaycana düşmən kəsilən qüvvələri getdikcə daha da narahat etməkdə, dövlətimizə qarşı hücumları intensivləşdirməkdədir", - bəyanatda bildirilir.
Qeyd olunur ki, erməni lobbisinin maliyyələşdirdiyi bir sıra QHT-lərin və bəzi siyasi qüvvələrin həqiqət yükü daşımayan, böhtan dolu dosyeləri əsasında antiazərbaycan mahiyyətli qətnamənin qəbul edilməsi Avropa Parlamentinin imicinə böyük ləkə, bu qurumla Azərbaycan arasındakı yüksək münasibətlərə ağır zərbədir.
Ana Vətən Partiyası iftira və böhtan mahiyyəti daşıyan bu tip qərəzli qətnamələri qətiyyətlə pisləyir və Avropa Parlamentini qəbul etdiyi ədalətsiz qətnamədən imtina etməyə çağırır.