...

Fuad Muradov: Belə məsələlər İrandakı azərbaycanlıların heysiyyətinə toxuna bilər

Siyasət Materials 16 Sentyabr 2016 17:14 (UTC +04:00)

Bakı. Trend:

Azərbaycanla İran arasında tarixi münasibətlər yüksək səviyyədədir və belə arzuolunmaz məqamlar iki ölkə arasındakı münasibətlətə mənfi təsir göstərə bilməz.

Trend-in məlumatına görə, bunu Milli Məclisin Gənclər və İdman komitəsinin sədri Fuad Muradov İranda keçirilən ermənilərin idman olimpiadasında Azərbaycan Respublikasının işğal olunmuş ərazilərində yaradılmış qondarma rejimin təmsil olunmasına münasibət bildirərkən deyib.

F.Muradov qeyd edib: “Azərbaycana dost ölkə olan İranın siyası dairələrindən bu kimi məsələlərin bir daha təkrarlanmaması üçün ciddi addımlar gözləyirik. Çünki burada Azərbaycan-İran münasibətlərini pozmağa çalışan qüvvələrin rolu olduğunu da danmaq olmaz. Son vaxtlar Azərbaycan-İran münasibətlərinin yüksələn xətt üzrə inkişaf etməsi heç şübhəsiz ki, bir çox dairələri narahat edir. Görünür, həmin qüvvələr ələ düşən hər fürsətdən istifadə etmək istəyirlər. Ancaq buna nail ola bilməyəcəklər. İran Azərbaycan üçün qonşu, tarixi dost və müttəfiq dövlətdir, ölkəmizin ərazi bütövlüyünü hər zaman dəstəkləyib”.

Komitə sədri diqqəti bu ilin yayında keçirilən Rio Olimpiya Oyunlarına da çəkib və qeyd edib ki, erməni idmançı həmin yarışlarda da təxribat törədib, separatçıları təbliğ edib: “Çox təəssüf ki, belə destruktiv hərəkətlərə Beynəlxalq Olimpiya Komitəsi adekvat reaksiya vermədi və buna görə də, az qala, bu kimi hallar bir tendensiya halını alıb. Hesab edirəm ki, terrorçuluğu təbliğ edənlərə imkan yaradan ölkələr özləri bundan əziyyət çəkəcəklər”.

F.Muradov bildirib ki, bu gün İranda milyonlarla azərbaycanlı yaşayır və Ermənistanın Qarabağı işğal etməsi nəticəsində İrandakı azərbaycanlıların xeyli sayda qohum-əqrəbası şəhid olub: “Düşünürəm ki, belə məsələlər İrandakı azərbaycanlıların heysiyyətinə toxuna bilər. İran öz vətəndaşlarının bu hala düşməsinin təbii ki, istəməz. Əgər xatırlayırsınızsa, İranın “Traxtor” futbol klubunun oyunu zamanı stadionda Azərbaycan bayrağının qaldırılması təşkilatçılarda ciddi narazılıq yaratmışdı. Hər halda gələcəkdə İran tərəfinin bu kimi həssas məqamları nəzərə alacağına bizdə əminlik var. Təbi ki, baş verən hadisəni İranın daxili işi kimi dəyərləndiririk. Ancaq orada Azərbaycan torpaqlarını işğal etmiş separatçıların öz qondarma bayraqları ilə çıxış etməsi biz tərəfdən məqbul hesab edilə bilməz. İnanmaq istəyirik ki, bir daha belə xoşagəlməz hallar baş verməyəcək. Azərbaycan-İran münasibətləri bundan sonra da inkişaf edəcək”.

Məqalədə:
Xəbər lenti

Xəbər lenti