Bakı. Trend:
Azərbaycan ATƏT-in prinsiplərinə hər zaman sadiqlik nümayiş etdirib.
Trend-in məlumatına görə, bu barədə bu gün xarici işlər naziri Ceyhun Bayramov Şimali Makedoniyanın xarici işlər naziri, ATƏT-in fəaliyyətdə olan sədri Buyar Osmani ilə birgə Bakıda keçirdiyi mətbuat konfransında deyib.
Nazir bildirib ki, Azərbaycan ATƏT-ə üzv digər dövlət tərəfindən uzun illər bundan öncə təşkilatın bütün fundamental norma və prinsiplərinə ziddə olaraq ciddi şəkildə təcavüzə məruz qalıb:
"Uzun müddət ərzində bu təcavüzün ağrılı nəticələri, Azərbaycan dövlətində, cəmiyyətində çox böyük mənfi təsirləri olub. Bütün bunlara baxmayaraq, Azərbaycan təşkilatın prinsiplərinə, beynəlxalq hüquqa, ilk olaraq ərazi bütövlüyü, suverenlik, sərhədlərin toxunulmazlığı kimi prinsiplərinə hər zaman sadiqlik nümayiş etdirib. Yalnız keçmiş Ermənistan- Azərbaycan münaqişəsi kontekstində yox, eyni zamanda ATƏT məkanında olan bütün digər münaqişələr kontekstində Azərbaycanın mövqeyi hər zaman prinsipial və ardıcıl olub", - C.Bayramov əlavə edib.
Qeyd edək ki, bu gün Şimali Makedoniyanın xarici işlər naziri, ATƏT-in fəaliyyətdə olan sədri Buyar Osmani ilə xarici işlər naziri Ceyhun Bayramov arasında təkbətək və geniş tərkibdə görüş keçirilib.