Bakı. Trend:
Senatorlar ABŞ prezidentinin 107-115 İctimai Qanundan istifadə edə bilməyəcəyini nəzərdə tutan C.3000 ermənipərəst qanunun qəbuluna səs veriblər.
Trend xəbər verir ki, akta əsasən, ABŞ prezidenti “Azadlığa Dəstək Aktı"na “907-ci düzəliş”in icrasını həyata keçirməkdən imtina etmək hüququndan məhrum edilir.
Belə ki, 907 saylı düzəlişdə Azərbaycana yardım göstərilməsi qadağan edilir.
ABŞ prezidenti 907 saylı düzəlişdən yan keçə və 2024-2025-ci illərdə büdcədən Azərbaycana yardım üçün maliyyə ayıra bilməz.
Qeyd edək ki, noyabrın 15-də ABŞ Konqresinin Nümayəndələr Palatasında beynəlxalq münasibətlər komitəsinin təşəbbüsü ilə "Dağlıq Qarabağın gələcəyi" mövzusunda dinləmələr keçirilib. Komitənin rəsmi saytında yer almış məlumata görə, dinləmələrdə ABŞ dövlət katibinin Avropa və Avrasiya məsələləri üzrə köməkçisi Ceyms O-Brayen və ABŞ Beynəlxalq İnkişaf Agentliyinin (USAİD) Avrasiya və Avropa Bürosunun administratorunun müavini Aleksandr Sokolovski çıxış ediblər. Dinləmələrin təşkilatçısı ABŞ konqresinin Avropa məsələləri üzrə alt komitəsinin sədri, respublikaçı senator Tomas Kin idi.
Göründüyü kimi, ABŞ illərdir Azərbaycanla və regionun digər oyunçuları ilə daha balanslaşdırılmış siyasət aparıb, indi isə daha fərqli siyasətə üz tutub. Lakin hələ də ikiüzlü, riyakar siyasətini davam etdirir. ABŞ və Qərb dövlətləri xüsusən islam dünyasına və müsəlman ölkələrinə qarşı açıq düşmən münasibəti göstərməyə başlayıb, terrorla mübarizə və demokratik standartların tətbiqi adı altında onların daxili işlərinə müdaxilələri gücləndirib. Eyni zamanda bu gün bütün dünya ABŞ və onun rəhbərliyi altında Qərbin yürütdüyü siyasətin acı fəsadlarını yaşayır. Qərbin əl uzatdığı ölkələr xaos, iqtisadiyyatın dağılması, yoxsulluq, böhran və müharibələrlə üz-üzə qalıblar.
Bundan başqa, ABŞ rəsmiləri hər zaman demokratiya haqqında çox dəyərli və təqdirəlayiq fikirlər səsləndirir, lakin Amerikanı və bir sıra inkişaf etmiş Qərb dövlətlərini oyundan kənarda saxlamaqla demokratiya standartlarını yalnız maraq kəsb edən ölkələrdə axtarırlar. Nəticə etibarilə ABŞ öz daxilində antidemokratik meyillərin geniş vüsət alması problemini deyil, digər ölkələrdə baş verən halları müzakirə etmək hayına qalır.
Xüsusən, bu ölkə rəsmiləri Azərbaycanla təmaslar zamanı belə təsəvvür formalaşdırmağa çalışırlar ki, guya ABŞ-də anti-Azərbaycan mövqe ayrı-ayrı konqresmenlərin lobbiçilik fəaliyyəti ilə məhdudlaşır. Bu cür siyasətlə də ABŞ özünün regiondakı mövqelərinə zərbə vurur. Çünki regionun lider dövləti olan Azərbaycanla münasibətlər bölgədə fəal olan istənilən ölkə üçün son dərəcə önəmlidir.