Bakı. Trend:
Azərbaycanda növbədənkənar parlamemt seçkilərində səsvermə prosesi yüksək səviyyədə təşkil edilmişdi.
Bunu Trend-ə açıqlamasında Mərakeş parlamentinin Nümayəndələr Palatasının sədrinin birinci müavini Mohammed Sabbari deyib.
“Seçki məntəqələri seçicilərin səsvermə hüququndan istifadə etməsi üçün çox gözəl hazırlanmışdı, səsvermə prosesi yüksək səviyyədə təşkil edilmişsi. Səsvermə zamanı ab-hava da gözəl idi”, - deyə o bildirib.
Onun sözlərinə görə, namizədlərin nümayəndələri üçün də şərait yaradılmışdı.
“Seçicilərin siyahılarına dəqiqliklə baxılırdı və nəzarət edilirdi. Seçicilər rahat şəkildə xüsusi ayrılmış yerlərdə səs verirdilər və səs verdikləri bülleteni şəffaf qutuya atırdılar. Mərakeş nümayəndələri olaraq, biz seçkiləri müşahidə etdik, söhbətlər apardıq və seçkilər barədə yalnız müsbət fikirlər eşitdik, prosesin şəffaf olmasına şahidlik etdik. Azərbaycan xalqını demokratik keçirilən seçkilər münasibəti ilə təbrik edirik”, - deyə o bildirib.
Qeyd edək ki, sentyabrın 1-də Azərbaycanda növbədənkənar parlament seçkiləri keçirilib. İlkin nəticələrə görə, seçkilərdə seçici fəallığı 37,27 faiz təşkil edib. Seçkilərdə səs verən seçicilərin sayı 2 196 771 nəfər olub. 5895 seçki məntəqəsi protokollarını MSK-ya təqdim edib.
Seçkiləri müşahidə etmək üçün 112 min 749 yerli müşahidəçi qeydə alınıb. Onlardan 65 mindən çoxu siyasi partiyaların nümayəndələridir. Qeydə alınmış beynəlxalq müşahidəçilərin sayı 598 nəfər olub ki, onlar 51 Təşkilatı, 69 ölkəni təmsil edib. Parlament seçkilərində qeydə alınan 990 namizəddən 305-i 25 siyasi partiyanın nümayəndəsidir. 371 nəfər siyasi partiyaların üzvü olmasına baxmayaraq, partiyalar tərəfindən namizəd olaraq irəli sürülməyiblər. Ümumilikdə 676 namizədin siyasi partiya mənsubiyyəti var.