Azərbaycan, Bakı, 23 iyun / Trend , müxbir R.Ergün/ Azərbaycanın "Qarabağ" futbol klubu Türkiyənin "Qalatasaray" komandasının keçmiş oyunçusu Mario Jardeldən imtina edib. "Jardeli bizə onun menecerləri təklif etmişdilər. Amma braziliyalı futbolçunu istəmədik. Çünki bəzi problemlər var idi. Bu problemlər oyunçunun özü ilə bağlı olduğu üçün açıqlamağım düzgün olmaz", bazar ertəsi Trend -a "Qarabağ" klubunun baş məşqçisi Rasim Kara deyib.
Trend -un arayışı: Jardel "Qalatasaray" klubu ilə Çempionlar Liqasında iştirak edib. O, Türkiyə klubunun heyətində UEFA superkubokunu qazanıb. Braziliyalı oyunçu Portuqaliyanın "Portu" klubunda çıxış edərkən bir mövsüm ərzində rəqib qapılarından 42 top keçirməsi ilə yadda qalıb. Futbolçunun son dövrlərdə gözdən itməsinin səbəbi şəxsi həyatındakı problemlərlə bağlı olub. İstədiyi qızdan ayrılan futbolçu, psixoloqa müraciət etməli olmuşdu.
Kara bildirib ki, "Qarabağ" klubu qarşıdakı günlərdə iki-üç yeni futbolçunun transferini həyata keçirəcək. "Bizə heyəti tam komplektləşdirmək üçün iki-üç futbolçu lazımdır. Amma bu futbolçuların arasında məşhur oyunçular olmayacaq", - deyə türkiyəli baş məşqçi əlavə edib.
"Qarabağ" bir neçə gün əvvəl Makedoniya yığma komandasının keçmiş kapitanı olan Artim Şakiri ilə müqavilə bağlayıb. Baş məşqçi deyib ki, 35 yaşlı Şakiri öz təcrübəsi ilə "Qarabağ"ın gənc futbolçularına kömək edəcək.
Məqalə müəllifi ilə əlaqə ünvanı: [email protected]