...

Azərbaycanda yanacaqdoldurma məntəqəsi və hərbi hissəyə silahlı basqınlar törədən dəstə üzvlərinə hökm oxunub

Cəmiyyət Materials 30 Oktyabr 2008 12:20 (UTC +04:00)
Azərbaycanda yanacaqdoldurma məntəqəsi və hərbi hissəyə silahlı basqınlar törədən dəstə üzvlərinə hökm oxunub

Azərbaycan, Bakı, 30 oktyabr / Trend , müxbir K.Zərbalıyeva/ Abşeron rayonu Müşfiq qəsəbəsindəki "ABU-Petrol" yanacaqdoldurma məntəqəsinə silahlı basqında ittiham edilən mütəşəkkil dəstənin üzvlərinə hökm oxunub.

Ağır Cinayətlərə Dair İşlər üzrə Məhkəmənin hökmü ilə dəstə başçısı Qahir Zəkiyevə 13 il 7 ay, Hüseyn Ələsgərova 13, Daşqın Ağabalayevə 13, Emin Ağayevə 11 il 2 ay, Sadiq Mirzəcanova 8 il 3 ay, Vüsal Zamanova 8 il 6 ay, Ramin Əhmədova 9, Tural Nəzərova 9, Ceyhun Həsənova 5 müddətinə azadlıqdan məhrumetmə cəzası verilib.

2001-ci ildən yaradılan cinayətkar dəstənin ilk işi həmin ilin iyununda Abşeron rayonunun Çaylı kəndindəki orta məktəbi yandırmaq olub.

Dəstə 2007-ci ilədək 10-a yaxın taksi sürücüsünə silahla hədə-qorxu gələrək onları qarət edib. 2004-cü ilin iyulunda Əli Bayramlı-Bakı Magistral yolunda "Azərenerji"yə məxsus elektrik naqillərini kəsib satmaqla bu quruma 112 manat məbləğində ziyan vurub. 118 saylı hərbi hissənin anbarına hücum edən silahlı dəstə oradan 1200 manatlıq məbləğində oğurluq edib.

Dəstənin sonuncu cinayəti ötən il oktyabrın 19-da saat 04.35 radələrində Abşeron rayonu Müşfiq qəsəbəsindəki "ABU-Petrol" yanacaqdoldurma məntəqəsinə etdikləri hücum olub. Dəstə üzvləri məntəqənin işçiləri, Bakı şəhər sakini Kamran Xanobadskini, Müşfiq qəsəbə sakini Zaur Fəttayevi və Tərtər rayon sakini Feyruz Məmmədovu odlu silahla hədələyərək onlara məxsus 3 ədəd mobil telefonu və məntəqəyə məxsus 1300 manat pulu aparıblar.

Dəstə üzvləri Cinayət Məcəlləsinin quldurluq (181.3.1), oğurluq (177.2.1), qanunsuz olaraq odlu silah və onun ehtiyat hissələrini əldə etmə (228.1, 228.2.1), əmlakı qəsdən məhv etmə və ya zədələmə (29.186.2.1) və digər maddələrlə ittiham olunurlar.

Müəlliflə əlaqə saxlamaq üçün elektron ünvan- [email protected]

Xəbər lenti

Xəbər lenti