Azərbaycan, Bakı, 4 fevral / Trend müxbir İ.İsabalayeva/
"Eurovision 2012" ilə bağlı tanıtım videoçarxlarının çəkilişləri üçün ikinci kastinqlərə start verilib.
Trend-in şənbə günü "Eurovision 2012" mahnı müsabiqəsinin rəsmi saytına istinadən verdiyi məlumata görə, kastinqlər saat 20:00-dək davam edəcək. Seçimlərdə iştirak etmək istəyən hər bir kəs Eurovision Mərkəzinə (Neftçilər prospekti, 44) gələ bilər.
"Eurovision Mahnı Müsabiqəsi Bakı 2012"-nin İşçi Qrupunun ilk kastinqləri yanvarın 6-da keçirilib. Bu seçimlərdə 388 nəfər iştirak edib. Yanvarın 6-sı və fevralın 4-dəki kastinqlərdən uğurlu nəticə əldə edən iştirakçılar ikinci mərhələyə dəvət olunacaqlar.
Kastinqlərin keçirilməsində məqsəd "Eurovision" mahnı müsabiqəsinin tanıtım videoçarxlarında çəkiləcək simaların sadə vətəndaşlar arasından seçilməsi və bu müsabiqədə hamının yaxından iştirakına imkan yaradılmasıdır.