Azərbaycan, Bakı, 1 iyun /Trend, müxbir İlhamə İsabalayeva/
Bu il Azərbaycanda ümumilikdə 88151 nəfər XI sinif, 107236 nəfər isə IX sinif şagirdinin buraxılış imtahanı verəcəyi gözlənilir.
Trend-in məlumatına görə, bunu Tələbə Qəbulu üzrə Dövlət Komissiyasının sədri Məleykə Abbaszadə bu gün keçirdiyi mətbuat konfransında bildirib.
Komissiya sədri deyib ki, buraxılış imtahanları təsdiq olunmuş qrafikə uyğun olaraq 2, 6, 11, 16 iyun tarixlərində aparılacaq.
Komissiya tərəfindən bu imtahanlara hazırlıq istiqamətində kompleks tədbirlər həyata keçirilib. İmtahan mərkəzlərinin müəyyənləşdirilməsi, respublikanın bütün bölgələri üzrə imtahan rəhbərləri və zal nəzarətçiləri ilə treninqlərin aparılması, "Şagird-məzun" elektron məlumat bazasına buraxılış sinif şagirdləri haqqında məlumatların daxil edilməsi, yoxlanması, "Ümumi təhsil pilləsinin dövlət standartları və proqramları (kurikumları)"na uyğun olaraq, testlər bankının zənginləşdirilməsi, eləcə də müxtəlif təşkilati və metodiki işlərlə bağlı genişmiqyaslı hazırlıq işləri tamamlanmaq üzrədir.
İmtahanlar şəhər, rayon, qəsəbə və kənd yaşayış məntəqələrində ümumilikdə 273 imtahan mərkəzində aparılacaq. İmtahan mərkəzləri formalaşdırılarkən şagirdlərin rahatlığını təmin etmək məqsədilə yaşadıqları ərazi üzrə yalnız şəhər və ya rayon mərkəzi deyil, kənd məktəblərinin yerləşdiyi binalardan da istifadə olunub. Bundan başqa, imtahan mərkəzindən 5 km və daha uzaqda yaşayan şagirdlərin imtahan mərkəzlərinə rahat şəkildə çatdırılması məqsədilə pulsuz avtobus xidmətləri təşkil olunub. Şagirdlərin imtahan başa çatdıqdan sonra yaşadıqları məntəqəyə qaytarılmaları da həmin avtobuslarla təmin olunacaq.
M.Abbaszadə qeyd edib ki, bu ildən ali təhsil müəssisələrinin V ixtisas qrupu və tam orta təhsil (11 illik) bazasında kolleclərə qəbul cari ilin məzunları üçün buraxılış imtahanının nəticələrinə əsasən həyata keçiriləcək. 2014-cü ildən isə ümumi (9 illik) təhsil bazasında kolleclərə qəbul həmin ilin məzunları üçün buraxılış imtahanının nəticələrinə əsasən aparılır.