Azərbaycan, Bakı, 17 iyun /Trend, müxbir Elmira Tariverdiyeva/
Səyyahlar üçün ədəbiyyat üzrə ixtisaslaşmış nüfuzlu "Lonely Planet" nəşri 2015-ci ildə səyahət edilməli ən maraqlı məkanların reytinqini dərc edib. Trend-in məlumatına əsasən, siyahıya Bakı da yer alıb.
"Lonely Planet"in versiyasına görə, Avropanın ən maraqlı məkanlarının TOP-10-luğu belədir: Akyureyri (İslandiya), Leypsiq (Almaniya), Azor adaları (Portuqaliya), Malaqa (İspaniya), Belqrad (Serbiya), Pyemont (İtaliya), Bakı (Azərbaycan), Amsterdam (Niderland), Tromse (Norveç), Portu (Portuqaliya)
Məqalədə deyilir: "Avropa çoxsaylı xalqları, onların adətlərini, tarixlərini, həyat tərzlərini birləşdirən möcüzəvi yerdir. Avropa o qədər maraqlı yerdir ki, səyahət etmək üçün bir istiqamət seçmək çox çətin məsələdir. Bizə güvənin! Avropanı beş barmağı kimi tanıyan "Lonely Planet"in redaktor və müəllifləri özlərinin də yaxın zamanlarda səyahət etməyi planlaşdırdıqları şəhərlərdən ibarət TOP-10-luğu sizin diqqətinizə çatdırır".
Saytda bildirilir ki, bu il siyahıda klassik məkanlarla yanaşı, yeni, çox şey vəd edən və perspektiv variantlar da yer alıb. Siyahıda çox da məşhur olmayan yerlər var ki, onlar da diqqətəlayiq məkanlardır.
Saytda Bakı haqqında bu məlumatlar qeyd edilib: "Xəzər dənizinin sahilində, Rusiya və İran arasında yerləşən Azərbaycanın paytaxtı Bakı özünü Avropaya aid edir və bütün qitənin sürətlə inkişaf edən şəhərlərindən biridir. Sovet dövrünün beton tikililərinin yerini tədricən Paris dəbdəbəsi və Dubay genişliyi tutur. Yeni memarlıq nümunəsinə Zaha Hadidin Heydər Əliyev Mərkəzi aid edilir. Bina ağ axıcı formanın hesabına istənilən baxış bucağından çox fotogenik görünür. YUNESKO-nun mədəni irsinə daxil edilmiş İçərişəhərin qala divarlarının üzərində üç mavi göydələn - Alov Qüllələri yüksəlir. Qüllələr kreativ işıq şousu sayəsində hər gecə alovlanır".