Azərbaycan, Bakı 14 fevral / Trend , müxbir İ.Xəlilova / Yeni "Azərbaycanın maliyyə sisteminin müasirləşdirilməsi" layihəsinin qiymətləndirilməsi və onun komponentlərinin dəqiqləşdirilməsi üçün fevralın 14-dən maliyyə sektoru üzrə böyük mütəxəssis Maykl Edvardsın (Layihə rəhbəri) Bakıya səfəri başlayır. Bu barədə cümə axşamı Azərbaycan Milli Bankının (MB) Statistika və Araşdırmalar Departamentinin direktoru Emin Hüseynov məlumat verib.
Missiyanın tərkibinə müxtəlif istiqamətli mütəxəssislər daxildir ki, onlardan bəziləri əvvəllər respublikamızda olublar.
Hüseynov bildirib ki, əvvəlki müzakirələr zamanı layihənin dörd komponenti formalaşıb. Bunlar maliyyə xidməti istehlakçıları hüqüqlarının müdafiəsi, sığorta, bank infrastrukturu və kapital bazarlarının inkişafdır.
MB xətti ilə komponentlərə bir neçə tədbir daxildir: MB tərkibində fəaliyyət göstərən mərkəziləşdirilmiş kredit reyestrinin daha mükəmməl texnologiyalara köçürülməsi, MB - da mərkəziləşdirilmiş məlumat bazasının yaradılması, ərazi təsərrüfatı maliyyələşdirilməsi mexanizminin yaxşılaşdırılmasıdır.
Dünya Bankı (DB) həm maliyyə, həm də texniki yardım nöqteyi - nəzərindən layihəni dəstəkləməyə hazırdır. Maliyyə Nazirliyi də bu layihə çərçivəsində sığorta qanunvericiliyinin təkmilləşdirilməsi üçün texniki dəstək almağa hazırdır.
Bu, DB-nın ölkənin maliyyə sektoru üçün ayıracağı üçüncü və güzəştli şərtlərlə sonuncu krediti olacaq. DB Azərbaycanın maliyyə sektoruna yardım göstərməyə artıq 5,4 mln. dollar, maliyyə xidmətlərinin inkişafına 12 mln. dollar kredit ayırıb.
Müəlliflə əlaqə saxlamaq üçün elektron ünvan: [email protected]