Azərbaycan, Bakı, 22 fevral /Trend, müxbir Ə.Həsənov /
Çərşənbə günü İqtisadi İnkişaf Nazirliyi yanında Sahibkarlığa Kömək Milli Fondu (SKMF) tərəfindən Bakı qəsəbələrində fəaliyyət göstərən 16 sahibkarlıq subyektinə 32 min manat məbləğində güzəştli kredit ayrılıb. Trend-in məlumatına görə, bu barədə jurnalistlərə fondun icraçı direktoru Şirzad Abdullayev bildirib.
"Həmin vəsaitlər hesabına layihələrin reallaşdırılması 40-dan artıq yeni iş yerinin açılmasına imkan verəcək", - Abdullayev Abşeron rayonunun Zirə qəsəbəsində keçirilən növbəti kredit yarmarkasının yekunları üzrə bildirib.
Onun sözlərinə görə, ümumilikdə 2012-ci ilin əvvəlindən SKMF 257 layihənin maliyyələşdirilməsinə 30,9 milyon manat məbləğində güzəştli kredit verilib.
"Fond onlardan yeni texnologiyaların tətbiq olunduğu 227 investisiya layihəsinin reallaşdırılmasına 26,1 milyon manat yönəldib, Bakı qəsəbələrindəki 30 layihəyə isə 4,8 milyon manat ayrılıb", - Abdullayev deyib.
Həmin layihələrin reallaşdırılması hesabına minə yaxın iş yeri yaradılacaq.