Azərbaycan, Bakı, 27 fevral /Trend, müxbir A.Axundov/
Dünya kapital bazarlarındakı qeyri-sabit vəziyyətlə əlaqədar olaraq, Azərbaycan bankı "Texnika Bank" avroistiqrazlarının növbəti yerləşdirilməsi məsələsində gözləmə mövqeyini tutub.
Bu barədə bazar ertəsi Trend-ə bankın idarə heyətinin sədri Samir Hüseynov bildirib.
"Avroistiqrazların yerləşdirilməsi imkanının öyrənilməsi üzərində iş gedir. Hər şey kapital bazarından asılıdır", - Hüseynov qeyd edib.
Onun sözlərinə görə, hazırda kapital bazarları olduqca dəyişkəndir və yerləşdirmə üçün qəbuledilməzdir.
"Hər şey mümkündür, lakin ən yaxşısı gözləməkdir", - Hüseynov vurğulayıb.
Qeyd edək ki, bank təmin edilməmiş avroistiqrazlarının ilk emissiyasının yerləşdirilməsi üçün Niderlandda "Texnika Finance B.V." şirkətini qeydiyyatdan keçirib. İstiqrazlar vasitəsilə "Texnika Bank" 12,75 faiz dərəcəsi və ödəniş müddəti 2009-cu ildə olmaqla 26 milyon dollar həcmində kredit cəlb edə bilib.