Dövlət Əmlakının İdarəedilməsi üzrə Dövlət Komitəsi "Mingəçevir İzolit" ASC-nin səhmlərinin satışı üzrə investisiya müsabiqəsini başa çatdırıb. Müsabiqənin yekunlarına görə, qalib "Alfa-layn" MMC-dir. Bu barədə Trend ə komitədən məlumat verilib.
Sərmayədarın qarşısına investisiya proqramını təqdim etmək şərti qoyulub. Bu proqramda keyfiyyətli elektrik izolyasiya materiallarının, şüşə-plastk məmulatların və digər kimyəvi məhsulların istehsalı üzrə qabaqcıl texnologiyaların tətbiqi, həmçinin, buraxılan məhsul çeşidinin genişləndirilməsi, müasir keyfiyyət standartlarına uyğunluğu, yeni iş yerlərinin açılması və əməkdaşların sosial təminatının yaxşılaşdırılması ilə bağlı məsələlər öz əksini tapmalı idi.
Şirkətin hazırladığı proqramda qeyd olunur ki, bir il ərzində müəssisəyə 701 min AZN məbləğində sərmayə qoyacaq. Bu vəsait mövcud istehsalın genişləndirilməsi və bərpasına, avadanlıq və mexanizmlərin müasir standartlara uyğunlaşdırılmasına yönəldiləcək. Həmçinin, yeni sınaq laboratoriyasının da inşası nəzərdə tutulur. "Alfa-layn" ilə imzalanmış sazişə əsasən, MMC 60 təqvim günü ərzində dövlət büdcəsinə 200 min AZN köçürməli və 90 təqvim günü ərzində 15 min özəlləşdirmə çeki təqdim etməlidir.
İnvestisiya fəaliyyətinin ilk dövründə işçilərin sayının 200 min nəfərə çatdırılması, əmək haqqının tədricən artırılması və əmək şəraitinin yaxşılaşdırılması planlaşdırılır. Bundan başqa şirkət qaçqın və kimsəsiz uşaqlara kömək etmək niyyətindədir.