Rabitə və informasiya texnologiyaları naziri Əli Abbasovun rəhbərlik etdiyi Azərbaycan nümayəndə heyəti iyulun 8-dən 17-dək ABŞ-a rəsmi səfərdə olub. Trend agentliyinin məlumatına əsasən, səfər çərçivəsində nümayəndə heyəti ABŞ-ın İnkişaf və Ticarət Agentliyi, ABŞ Ticarət Departamenti, Azərbaycan-Amerika Ticarət Palatası, Azərbaycanın ABŞ-dakı səfirliyi, Microsoft, ABŞ Dövlət Departamenti, Dünya Bankı, Beynəlxalq Maliyyə Korporasiyasının nümayəndələri ilə görüşüb.
Bundan əlavə, Əli Abbasovun konqresmen Kurt Veldon ilə görüşü olub, ABŞ-ın müvafiq departamentinin rəhbər müavini Frenklin Leyvin ilə "Qarşılıqlı anlayış haqqında" memorandumun təfərruatları müzakirə olunub. Memorandumu oktyabrda Bakıda "BakuTel-2006" sərgi-konfransı çərçivəsində imzalamaq planlışdırılır.
Nümayəndə heyəti Azərbaycan-Amerika Ticarət Palatası, Azərbaycanın ABŞ-dakı səfirliyi tərəfindən Vaşinqtonda təşkil olunan İKT üzrə biznes forum və San-Xosedə keçirilən birinci Azərbaycan-Amerika biznes forumunda iştirak edib, Stenford Universitetinin Beynəlxalq Tədqiqat Mərkəzinə baş çəkib. Bundan əlavə Microsoft şirkətinin vitse-prezidenti Stiv Balmerlə görüş təşkil olunub ki, burada gələcək inkiaşfın perspektivləri müzakirə olunub.
Azərbaycan nümayəndə heyətinin tərkibinə Rabitə Nazirliyinin nümayəndələri, Sinam, Ultra, AZEL, Milli Elmlər Akademiyasının İnformasiya Texnologiyaları İnstitutunun rəhbərləri, HP, Cisco və Microsoft-un nümayəndələri daxil olub.