Suriyanın xarici işlər naziri Valid əl-Muallim Londonda ərəb dilində nəşr edilən "Əş-Şərq əl-Ausat" qəzetinə müsahibəsində Dəməşqin Colan yüksəkliklərinin tam qaytarılmasını tələb etdiyini yenidən qeyd edib.
Əl-Muallim bildirib ki, İsrailin keçmiş baş naziri Ehud Olmert Suriya rejiminə Colan yüksəkliklərindən 1967-ci il 4 iyun sərhdələrinə doğru geri çəkiləcəyini söz verib və bu öhdəlik Türkiyənin vasitəçiliyi ilə Suriya-İsrail sülh danışıqlarına başlamağa imkan verəcək.
Əl-Muallim əlavə edib ki, Sipi Livni Olmertin dediyinə əməl etməli və Colan yüksəkliklərindən geri çəkilmək barədə öhdəlik götürməlidir ki, sülh danışıqları müvəffəqiyyətlə nəticələnsin. "Sülh danışıqları "ərazi mübadiləsi əvəzində sülh" prinsipinə, Madrid konfransının qərarlarına və 1967-ci il 4 iyun sərhədlərinə əsaslanır. Əgər İsrail hökuməti bu prinsiplər əsasında sülh danışıqlarına hazırdırsa, biz də hazırıq", - Suriya XİN-in rəhbəri qeyd edib.
Onun sözlərinə görə, birbaşa olmayan danışıqların dörd mərhələsinin gedişində 1967-ci il 4 iyun sərhəd xətti (altı günlük müharibə) müzakirə edilib. "Birbaşa olmayan danışıqlar tərəflərin hər hansı ümumi fikrə gəlmələrinə səbəb olsa, birbaşa dialoqa keçmək olar", - o əlavə edib.
Suriya xarici siyasət idarəsinin rəhbəri vurğulayıb ki, Suriya lideri Bəşər Əsədə İsrail rəhbərliyi ilə görüşməyi təklif edən İsrail prezidenti Şimon Peres də Ənvər Sadat və Kral Hüseyn kimi "arabanı atdan irəli qoyur". "Onun təklifləri sübut edir ki, İsrailin dövlətçilik əzmi yoxdur və sülh istəmir. Danışıqlar mövcud problemlərin həll edilməsinə, İsrail və Suriya arasında bərabər münasibətlərin qurulmasına gətirib çıxarmalıdır", - o deyib.