.jpg)
Yeni nəticələr əlavə olunub (ilk xəbər saat 11:45-də yayılıb)
Azərbaycan, Bakı, 26 iyun /Trend, müxbir İlkin İzzət/
Bakı-2015 birinci Avropa Oyunları çərçivəsində cüdo yarışları davam edir. Heydər Əliyev adına İdman Sarayında keçirilən cüdo yarışlarında bu gün 8 idmançımız medallar uğrunda mübarizə aparacaq. Onlardan 3-ü ölkəmizi gözdən əlillərin cüdo yarışlarında təmsil edəcək.
Trend xəbər verir ki, Avropa Oyunlarının cüdo yarışlarının ikinci günü Azərbaycan təmsilçilərindən ilk olaraq tatami üzərinə 63 kq-dək çəki dərəcəsindəki qadın təmsilçimiz Xanım Hüseynova çıxıb. Onun seçmə mərhələsindəki rəqibi Makedoniya idmançısı Katerina Nikoloska olub.
Görüşə Makedoniya təmsilçisi daha fəal başlayıb və bir yuko xalı ilə önə keçib. Sona doğru X.Hüseynova bunun əvəzini çıxıb. Amma son saniyələrdə cüdoçumuz daha bir yuko xalı ilə qiymətləndirilən fənd tətbiq edib. Nəticədə Xanım qalib gələrək 1/8 final mərhələsinə vəsiqə əldə edib.
Növbəti mərhələdə cüdoçumuzun rəqibi Fransa idmançısı Klaris Aqbeqneno olacaq.
X X X
Avropa Oyunlarının cüdo yarışlarında Azərbaycanı 63 kq-dək çəki dərəcəsində təmsil edən daha bir cüdoçumuz Nuriyyə Axundova seçmə mərhələdə Polşa idmançısı Aqata Ozdoba ilə qarşılaşıb. Cəmi bir neçə saniyə davam edən görüşdə təmsilçimizə ağrıdıcı fənd tətbiq edən Polşa cüdoçusu qalib gələrək növbəti mərhələyə vəsiqə qazanıb.
Eyni aqibəti Azərbaycanın medal ümidlərindən hesab edilən kişi cüdoçumuz, 73 kq çəki dərəcəsindəki təmsilçimiz Rüstəm Orucov da yaşayıb. Çex idmançı Yezek Yaromir ilə görüşdə rəqibinin ağrıdıcı fəndinə düşən Rüstəm məğlub olub və mübarizəni erkən dayandırıb.
X X X
Çəkisi 70 kq-dək olan qadın cüdoçuların yarışlarında Azərbaycanı təmsil edən Validə Mirzəzadə Belçika cüdoçusu Roksane Taeymans ilə üz-üzə gəlib və vaxtından əvvəl məğlub olub.
Eyni çəkidə çıxış edən digər cüdoçumuz Nərgiz İbrahimova təsnifat mərhələsində Xorvatiya təmsilçisi Barbara Matiç ilə qarşılaşacaq.
Gözdən əlil cüdoçuların yarışında isə ölkəmizi iki kişi, bir qadın idmançı təmsil edəcək. 57 kq-dək gözdən əlil qadın cüdoçuların yarışında mübarizəyə birbaşa 1/4 final mərhələsindən qoşulacaq Səbinə Abdullayevanın rəqibi İspaniya təmsilçisi Mariya Monik Merensiano Herrero olacaq.
90 kq-dan artıq çəkidə gözdən əlil kişilərin yarışında ölkəmizin şərəfini adlı-sanlı idmançımız İlham Zəkiyev və Zakir Mislimov qoruyacaq. Z.Mislimov 1/4 final mərhələsində ukraynalı Oleksandr Pominov ilə üzləşəcək. İ.Zəkiyev isə mübarizəyə birbaşa yarımfinaldan qoşulacaq.
X X X
Çəkisi 70 kq-dək olan qadın cüdoçuların yarışlarında Azərbaycanı təmsil edən Nərgiz İbrahimova seçmə mərhələdə Xorvatiya təmsilçisi Barbara Matiç ilə qarşılaşıb, lakin o da mübarizəni erkən dayandırıb.
Görüş cəmi bir neçə saniyə davam edib və xorvat cüdoçu ipponla qalib gələrək növbəti mərhələyə vəsiqə əldə edib.