Bakı. Trend:
Son illərdə Bosniya və Herseqovina ilə Azərbaycan arasındakı ikitərəfli əlaqələr sürətlə inkişaf edir.
Bu barədə Trend-ə özəl müsahibəsində Bosniya və Herseqovina Rəyasət Heyətinin sədri Jelka Tsviyanoviç bildirib.
"Əminliklə deyə bilərəm ki, hazırda münasibətlərimiz son dərəcə möhkəmdir və səmimi dostluq prinsiplərinə əsaslanır. İlk növbədə, Prezident İlham Əliyevə dərin minnətdarlığımızı bildiririk, çünki onun şəxsi töhfəsi institusional əlaqələrimizin güclənməsində mühüm rol oynayıb", – deyə Tsviyanoviç qeyd edib.
O, Bakıda baş tutan son görüşdən danışaraq, burada tərəflərin əməkdaşlığın inkişafını müzakirə etdiklərini bildirib. Tsviyanoviç həmçinin Bosniya və Herseqovina ilə Azərbaycan arasında Strateji Tərəfdaşlıq Bəyannaməsinin imzalandığını xatırladıb.
"Biz əlaqələrimizin möhkəmlənməsi və qarşılıqlı maraq doğuran sahələrdə əməkdaşlıq və biznes əlaqələrinin inkişafı üçün etibarlı təməl yaratmaq istiqamətində fəal işləməyə davam edirik", – deyə o vurğulayıb.
Bosniya və Herseqovina ilə Azərbaycanın nəqliyyat-logistika sahəsində əməkdaşlıq perspektivlərinə toxunan Tsviyanoviç, hər iki ölkənin coğrafi mövqeyinin strateji üstünlüklər yaratdığını və bu potensialın regional ticarətin genişlənməsinə töhfə verə biləcəyini bildirib.
O, xüsusilə Orta Dəhlizin əhəmiyyətinin artdığını qeyd edərək, Bosniya və Herseqovinanın Azərbaycan məhsulları üçün mərkəzi distribusiya qovşağına çevrilə biləcəyini, eyni zamanda Mərkəzi və Qərbi Avropaya geniş ticarət axınlarını asanlaşdıra biləcəyini vurğulayıb.
Bununla yanaşı, Tsviyanoviç bu potensialın gerçəkləşməsi üçün ciddi infrastruktur inkişafının zəruriliyini qeyd edib. "Bunun əsas şərti yeni və müasir nəqliyyat marşrutlarının tikintisidir ki, bu da malların Bosniya və Herseqovina vasitəsilə daha sürətli və iqtisadi cəhətdən səmərəli şəkildə daşınmasını təmin edəcək", – deyə o bildirib.
O əlavə edib ki, Bosniya və Herseqovina hökuməti Azərbaycan tərəfdaşları ilə nəqliyyat infrastrukturunun inkişafına dair konkret layihələrin işlənib hazırlanması üçün fəal danışıqlar aparır.
"Ümid edirik ki, bu layihələr yaxın gələcəkdə həyata keçiriləcək", – deyə Tsviyanoviç bildirib.
Tsviyanoviç xüsusilə energetika sektorunu prioritet sahə kimi vurğulayıb.
"Energetika ən perspektivli sahələrdən biridir və ümumi inkişaf üçün mühüm əsasdır. Təbii ehtiyatlar və enerji resursları baxımından zəngin olan Azərbaycan geniş əməkdaşlıq imkanları açır", – deyə o qeyd edib.
Tsviyanoviç enerji təhlükəsizliyinin qlobal gündəmdə getdikcə daha aktual bir mövzuya çevrildiyini qeyd edərək, bu sahədə əməkdaşlığın əhəmiyyətinin artdığını vurğulayıb. O bildirib ki, Azərbaycan və Bosniya və Herseqovina arasında yüksək səviyyəli dialoq və institusional əməkdaşlıq davam edir.