Bakı. Trend:
Azərbaycanda tikinti materiallarında yerli istehsal artığına görə ciddi qiymət artımı gözlənilmir.
Trend xəbər verir ki, bunu 10 aprel - İnşaatçılar Gününə həsr olunmuş “ATMİA İnşaatçılar Həftəsi“ ilə bağlı mətbuat konfransında Azərbaycan Tikinti Materialları İstehsalçıları Assosiasiyasının (ATMİA) baş katibi Şahanə Sarı deyib.
O qeyd edib ki, tikinti bazarında qiymət artımı ilə bağlı ətraflı məlumat vermək üçün bu məsələ ekspertlər tərəfindən analiz edilməlidir.
Bununla yanaşı, baş katib ATMİA-nın Avropaya tikinti materiallarının ixracı prosesi üzərində işləməsindən də söz açıb:
“Balkan yarımadası vasitəsilə istehsalçıların Avropaya ixrac etməsi üzərində işləyirik. Hazırda bu işlər davam etdirilir. İlkin olaraq, Avropaya ixrac olunan inşaat materiallarının standartlarını öyrənmə mərhələsindəyik.
Bizim oraya məhsul ixrac etməmiz üçün materiallarımızın hansı standartlara cavab verdiyini bilməliyik. İlkin qiymət araşdırmasına görə, Avropa bazarı bizim üçün sərfəli ola bilər, amma məsafənin uzaq olması, bir neçə ölkədən keçdiyinə görə, həmin ölkələrin gömrük xərcləri, daşınma xərcləri və digər xərclər araşdırılır”.