Bakı. Trend:
Azərbaycan incəsənət ustaları ilk dəfə olaraq Özbəkistan ali məktəblərinin tələbələri üçün ustad dərsləri keçiriblər.
Trend xəbər verir ki, Azərbaycanın Özbəkistandakı səfirliyinin nəzdindəki Heydər Əliyev adına Mədəniyyət Mərkəzinin Özbəkistan Dövlət İncəsənət və Mədəniyyət İnstitutu, habelə Yunus Rəcəbi adına Özbəkistan Milli Musiqi Sənəti İnstitutu ilə razılaşma əsasında Mədəniyyət Mərkəzinin təşəbbüsü və təşkilatçılığı, Beynəlxalq Muğam Mərkəzinin dəstəyi ilə Azərbaycanın mədəniyyəti, incəsənəti, ədəbiyyatı və tarixinə aid mövzuların Özbəkistan ali məktəblərinin tədris proqramlarına salınması layihəsi çərçivəsində Azərbaycan Respublikasının Xalq artisti Zabit Nəbizadə, Azərbaycan Respublikasının Əməkdar artistləri Sahib Paşazadə və Xəyyam Məmmədov tərəfindən İnstitutlarının tələbələrinə mühazirələr oxuyub və ustad dərsləri keçiblər.
Mühazirədən əvvəl azərbaycanlı artistlər fakültələrdə tədrisin təşkili ilə tanış olub, müəllim heyəti ilə görüşüb, müzakirə və fikir mübadiləsi həyata keçiriblər.
Zabit Nəbizadə və Xəyyam Məmmədov mənəvi zənginliyin, təhsilin və tərbiyənin artırılmasında Azərbaycan milli muğam sənətinin və özbək milli makom sənətinin əhəmiyyətindən danışıblar. Azərbaycan muğamları, xalq mahnıları, təsnifləri haqqında geniş məlumat verərək onların ifa üslubu, muğamda qəzəl seçimi, xüsusiyyətlərini tamaşaçılara izah ediblər. Ustad dərsləri çərçivəsində muğamlarımız ifa olundu, dəstgah anlayışı, şöbələrin ardıcıllığı ustalıqla dinləyicilərə çatdırılıb.
Sahib Paşazadə yeddi əsas Azərbaycan muğamlarının rast, şur, segah, cahargah, bayati-şiraz, humayun və şüştərin xarakter, ifa xüsusiyyətləri, başqa ölkələrin muğamlarında fərqli cəhətlərini çox peşəkar səviyyədə professor və tələbə heyətinə geniş izahlı şəkildə məlumat verdi. Bundan başqa tar ifaçılığında Azərbaycan bəstəkarlarının əsərlərinin interpretasiyası üslubu, alətin texniki və bədii imkanları haqqında geniş məlumat verərək bir neçə Azərbaycan bəstəkarının əsərlərini ifa etdi. Hər ifadan sonra isə əsərin ifa traktovkası, dinləyicilərə catdırılmasını da izah edilib.
Qeyd edilib ki, bir neçə gün davam edən ustad dərslərdə Özbəkistan Mədəniyyət Nazirliyinin nümayəndələri, müəllimlər, tələbələr və jurnalistlər iştirak edib.
