Bakı. Trend:
Avropa İttifaqının (Aİ) iqlim fəaliyyəti üzrə komissarı Vopke Hukstra ölkəmizin sədrliyi ilə keçirilən COP29-da əldə olunan tarixi uğurların əhəmiyyətini növbəti dəfə vurğulayıb.
Trend xəbər verir ki, 26 mart 2025-ci il tarixində Almaniyada keçirilən Petersberq İqlim Dialoqu çərçivəsində bu ölkənin xarici işlər naziri Annalena Berbok, BMT-nin İqlim Dəyişmələri üzrə Çərçivə Konvensiyasının Tərəflər Konfransının (COP) 30-cu sessiyasının müəyyən olunmuş prezidenti Andre Korrea və Aİ-nin iqlim fəaliyyəti üzrə komissarı Vopke Hukstranın iştirakı ilə keçirilən birgə mətbuat konfransında Azərbaycanın sədrliyi və ev sahibliyi ilə keçirilmiş COP29 zamanı əldə olunan tarixi nailiyyətlərdən növbəti dəfə bəhs olunub.
Mətbuat konfransı zamanı komissar Vopke Hukstra COP29 zamanı 100 milyard dollarlıq maliyyə hədəfini üç dəfə artırmaqla bağlı çətin, bir o qədər də tarixi qərarın verildiyini və bununla iqlim maliyyəsi sahəsində yeni bir eranın başlanğıcının qoyulduğunu diqqətə çatdırıb.
Vopke Hukstra, həmçinin cari ildə Braziliyanın Belem şəhərində keçiriləcək COP30-un Paris sazişinin tam icrasına, habelə COP28 və COP29 zamanı əldə olunan uğurların daha da möhkəmləndirilməsinə sadiqliyi təsdiqləmək şansı olduğunu bildirib.