Bakı. Trend:
Orta dəhlizin Xəzər dənizinin şərqində bir neçə marşrutu olsa da, qərbində, demək olar ki, eyni marşrut üzrə bəzi istisnalar olmaqla, Türkiyəyə qədər uzanır.
Bunu Trend-ə açıqlamasında iqtisadçı Eldəniz Əmirov deyib.
O qeyd edib ki, Bakı-Tbilisi-Qars dəmiryolu, o cümlədən, avtomobil nəqliyyatının istifadə edildiyi marşrut üzrə Gürcüstan üzərindən Türkiyəyə uzanır:
"Amma Zəngəzur dəhlizi açıldıqdan sonra bilavasitə bu marşrut qısalacaq. Yükdaşımaların sürəti və effektivliyi artacaq. Təbii ki, Gürcüstan tərəfində olan marşrut da qalacaq. Bununla seçimlər olacaq. Daşıma şirkətlərinin bu infrastruktura xidmət göstərən təsərrüfat subyektləri arasında rəqabət mühiti artacaq. Əlavə olaraq Zəngəzur dəhlizi üzərindən keçəcək bu məsafə Gürcüstan üzərindən keçən məsafədən təxminən 200-300 km daha qısa olacaq.
Zəngəzur dəhlizi Şərq-Qərb nəqliyyat dəhlizinin Qafqaz regionu üzrə yeni marşrutunu formalaşdıracaq. Bu dəhlizdən bir çox ölkə yararlanacaq. Dəhliz işğaldan azad edilmiş ərazilərin iqtisadi reinteqrasiyası üçün müstəsna əhəmiyyəti olacaq".
Nəqliyyat məsələləri üzrə ekspert Fuad Əliyev qeyd edib ki, Zəngəzur dəhlizinin açılması Orta dəhlizin inkişafına bir neçə müsbət təsir göstərə bilər:
"Zəngəzur dəhlizi Ermənistanın qərbindən keçərək, Azərbaycanı və Türkiyəni birləşdirəcək strateji bir nəqliyyat yoludur və bu, Orta dəhlizin mövcudluğuna və inkişafına yeni imkanlar yarada bilər. Orta dəhliz daha əvvəl Çindən başlayaraq Mərkəzi Asiya ölkələri, Qafqaz və Türkiyə üzərindən Avropaya gedən marşrut olaraq önə çıxıb".
Ekspert qeyd edib ki, Zəngəzur dəhlizi Orta dəhlizlə birləşən yeni nəqliyyat marşrutları yaradacaq.
"Bu, ticarət yollarının və logistika şəbəkələrinin daha sürətli və daha səmərəli olmasına kömək edəcək. Azərbaycanın, Türkiyənin və digər region ölkələrinin birbaşa əlaqəsi daha da möhkəmlənəcək. Dəhlizin açılması Azərbaycan və Türkiyənin ticarət imkanlarını genişləndirəcək.
Orta dəhliz vasitəsilə Çindən gələn və Avropaya gedən məhsulların hərəkəti daha sürətli olacaq, bu da regional ticarətin artmasına səbəb olacaq. Bu yeni nəqliyyat marşrutları Orta dəhliz üzərindəki ölkələrə iqtisadi faydalar gətirəcək, investisiyaların cəlb olunmasına və yeni biznes imkanlarının yaranmasına şərait yaradacaq.
Zəngəzur dəhlizinin açılması Orta dəhliz marşrutunu daha da strateji əhəmiyyətli edəcək", - deyə o vurğulayıb.