Bakı. Trend:
Aprel döyüşləri tarixi zəfərimizə gedən yolda ilk müjdə oldu. Bu döyüşlər xalqımıza ilkin qələbəni yaşatmaqla strateji yüksəkliklərin erməni işğalından azad edilməsinə gətirib çıxardı. Beləliklə, ermənilərin yalandan uydurduğu “ordunun məğlubedilməzliyi” sindromu sındırıldı.
Bu fikirləri Trend-ə açıqlamasında Milli Məclisin deputatı Hikmət Babaoğlu bildirib.
O xatırladıb ki, Azərbaycan ordusu, rəşadətli əsgərimiz nəyə qadir olduğunu göstərdi:
“Azərbaycan ordusu tək bir həmlə ilə işğal altında olan 4 rayonumuzun xeyli ərazisini işğaldan azad edə bildi. Bu, miqyas baxımından kiçik olsa da, mənəvi və hərbi-psixoloji baxımdan yüksək qələbə idi. Azərbaycan ordusunun gücünü dost da, düşmən də gördü və qiymətləndirdi”.
Millət vəkili vurğulayıb ki, döyüşlərdən sonra hərbi-diplomatik müstəvidə də ermənilərin mövqeyi dəyişməyə başladı.
“Ancaq çox təəssüf ki, sonadək manipulyasiya edərək işğalçılıq siyasətlərindən əl çəkmədilər. Nəticədə məhz Aprel döyüşlərindın başlayan yol tarixi zəfərimizədək gəlib çıxdı. Cocuq Mərcanlı kəndi, Lələtəpə yüksəkliyi işğaldan azad edildi. Beləliklə, Azərbaycan xalqında öz ordusuna, liderinə inam daha da artdı.
Tarix sübut etdi ki, bu inam, qələbə əzmi, ümid Azərbaycan xalqında boşuna yaranmamışdı. 2025-ci ilin zirvəsindən dönüb 2016-cı ilin aprelinə baxdıqda hər bir azərbaycanlının üzündə xoş bir təbəssüm yaranır. Çünki bizi bu günlərə gətirən məhz uzun müddət sürən atəşkəsdən sonra Azərbaycan xalqının əldə etdiyi miqyasca kiçik, amma mənəvi baxımdan böyük zəfərin anılması günüdür”, - deyə deputat qeyd edib.
Milli Məclisin deputatı Arzuxan Əlizadə isə Trend-ə açıqlamasında Aprel döyüşlərində əldə olunan nəticələrdən bəhs edib:
“2016-ci il aprel 2-də Azərbaycan Silahlı Qüvvələri çox ciddi hərbi əməliyyat həyata keçirdi. Nəticədə Lələtəpə yüksəkliyi, eləcə də Tərtərin Talış kəndi ətrafındakı strateji yüksəkliklər, həmçinin Cocuq Mərcanlı kəndi, Gorboyun Gülüstan, Tərtərin Qazaxlar, Suqovuşan kəndi istiqamətində, eləcə də digər istiqamətlərdə bir sıra strateji yüksəklik və yollar erməni hərbi birləşmələrindən təmizləndi. Amma o zaman kənar təsirlər nəticəsində biz hücumu dayandırmaq məcburiyyətində qaldıq. Amma istənilən halda Aprel döyüşləri qarşı tərəfə Azərbaycanın əməldə öz ərazilərinin itikisi ilə barışmayacağını növbəti dəfə nümayət etdirmiş oldu, qarşı tərəfin ciddi itkiləri ilə nəticələndi”.
Millət vəkilinin sözlərinə görə, bu, əslində İkinci Qarabağ müharibəsi və həmin savaşda Azərbaycan Silahlı Qüvvələrinin ciddi əməliyyatlar həyata keçirəcəyinə yönəlik qarşı tərəfə verilmiş siqnal idi:
“Ondan sonra Azərbaycan ərazilərini dinc yolla, müharibəsiz işğaldan azad etmələri ilə bağlı erməni separatçılarına dəfələrlə çağırışlar edildi və gücümüzü də artıq görmüşdülər, amma təəssüflər olsun ki, bundan doğru, düzgün nəticə çıxarmadılar.
Nəticə etibarilə 4 il keçəndən sonra biz genişmiqyaslı hərbi əməlliyyatlar həyata keçirməklə 44 gün ərzində ermənilərin 30 ilə yaxın müddət ərzində qurduqları istehkamları, onların keçilməz hesab etdikləri sədləri yerlə yeksan etdik və 44 gün ərzində Azərbaycan ərazilərinin əhəmiyyətli hissəsi işğalçılardan təmizləndi. Düşmən çox böyük itkilərlə geri çəkilməyə məcbur edildi.
Ondan sonrakı dönəmdə həyata keçirilən antiterror əməliyyatları ilə faktiki olaraq problemi kökündən həll etdik. Erməni hərbi birləşmələri, terror qrupları Azərbaycan ərazisində qanunsuz məskunlaşmış, dislokasiya olunmuş minlərlə erməni terrorçusu zərərsizləşdirildi və fərari kimi qaçmağa məcbur oldular”.
A.Əlizadə qeyd edib ki, Azərbaycan regionda yeni reallıqlar yaratdı.
“Erməni tərəfi, onlara havadarlıq eləyənlər bu gün Azərbaycanın regiondakı gücü ilə barışmaq məcburiyyətindədirlər və Azərbaycan hazırda regionun ən güclü söz və güc sahibidir”, - deyə o fikrini tamamlayıb.