Bakı. Trend:
SOCAR və onun törəmə müəssisələri "Qərbi Abşeron" yatağında metan emissiyalarının azaldılması üçün investisiyaların müəyyənləşdirilməsi və prioritetləşdirilməsi istiqamətində iş aparır.
Trend-in tədbirdəki müxbirinin məlumatına görə, bunu Asiya İnkişaf Bankının (AİB) Mərkəzi və Qərbi Asiya Regional Departamentinin Azərbaycan üzrə ölkə direktoru Sunniya Durrani-Camal çərşənbə günü Bakıda keçirilən 9-cu Dayanıqlı İnkişaf Məqsədləri (DİM) Dialoqunda deyib.
Onun sözlərinə görə, metan emissiyalarının azaldılması Azərbaycanın iqlim hədəflərinə nail olması baxımından mühüm əhəmiyyət daşıyır. Bu istiqamətdə investisiyaların düzgün müəyyənləşdirilməsi və ən səmərəli tədbirlərin prioritetləşdirilməsi vacibdir.
S.Durrani-Camal bildirib ki, Azərbaycan 2035-ci ilədək istixana qazı emissiyalarını 1990-cı il səviyyəsi ilə müqayisədə 40 faiz azaltmağı hədəfləyir. Bu məqsədə çatmaq üçün ölkənin maliyyə resurslarına, müasir texnologiyalara və geniş tərəfdaşlığa ehtiyacı var.
“2035-ci ilə qədər emissiyaların 40 faiz azaldılması hədəfinə nail olmaq üçün artıq çox vaxtımız qalmayıb. Buna görə də səylərimizi ikiqat artırmalıyıq”, – deyə o qeyd edib.
AİB rəsmisi vurğulayıb ki, bank Azərbaycanın "yaşıl iqtisadiyyat"a keçidini həm dövlət, həm də özəl sektor investisiyaları, eləcə də texniki yardım vasitəsilə dəstəkləyir.
Onun sözlərinə görə, AİB-nin 2025–2029-cu illər üzrə Azərbaycanla tərəfdaşlıq strategiyası iqtisadiyyatın şaxələndirilməsinə, "yaşıl inkişaf"ın təşviqinə və aşağı karbonlu nəqliyyat əlaqələrinin genişləndirilməsinə yönəlib.
“Biz Azərbaycanın "yaşıl iqtisadiyyat"ının şaxələndirilməsini və aşağı karbonlu əlaqələrin inkişafını dəstəkləyirik. Buraya müasir, enerjiyə qənaət edən və təhlükəsiz dəmir yolu şəbəkəsinin inkişafı da daxildir”, – deyə S.Durrani-Camal bildirib.
O əlavə edib ki, Bakı metropoliteninin genişləndirilməsi və rəqəmsallaşdırılması şəhər daxilində hərəkətliliyin yaxşılaşdırılmasına, nəqliyyat sisteminin səmərəliliyinin artırılmasına və aşağı karbonlu nəqliyyat həllərinin inkişafına töhfə verə bilər.
AİB rəsmisi regional "yaşıl enerji" bağlantılarının əhəmiyyətinə də toxunub. Onun sözlərinə görə, Mərkəzi Asiya və Xəzər hövzəsi arasında "yaşıl enerji" dəhlizlərinin inkişafı elektrik enerjisinin sərhədlərarası ötürülməsinə və bərpa olunan enerji mənbələrinin regional enerji sistemlərinə inteqrasiyasına imkan yaradır.
O qeyd edib ki, su infrastrukturuna investisiyaların artırılması da mühüm əhəmiyyət daşıyır. Bu cür investisiyalar sistemlərin etibarlılığını gücləndirməklə yanaşı, onların ekstremal hava şəraitinə davamlılığını artırır.
S.Durrani-Camal AİB-nin Azərbaycanda günəş enerjisi layihələrinin inkişafına verdiyi dəstəyi də vurğulayıb. Onun sözlərinə görə, bankın özəl sektor əməliyyatları 2022-ci ildə fəaliyyətə başlayan Qaradağ Günəş Elektrik Stansiyasının, eləcə də Biləsuvar və Bankə günəş enerjisi layihələrinin dəstəklənməsində mühüm rol oynayıb.
“Bərpa olunan enerji layihələrinin inkişafı Azərbaycanın enerji keçidinin vacib hissəsidir. Bununla yanaşı, emissiyaların azaldılması üçün mövcud enerji istehsalı və sənaye proseslərinin də daha səmərəli və ekoloji cəhətdən dayanıqlı olması vacibdir”, – deyə o bildirib.
AİB rəsmisi bankın Azərbaycanın iqlim öhdəliklərinin yerinə yetirilməsinə texniki dəstək göstərdiyini də diqqətə çatdırıb. O bildirib ki, bu dəstək Paris Sazişinin Gücləndirilmiş Şəffaflıq Çərçivəsi üzrə öhdəliklərin icrasını, ilk ikiillik şəffaflıq hesabatının hazırlanmasını və milli səviyyədə müəyyən edilmiş töhfələrin (NDC) formalaşdırılmasını əhatə edib.
"Yaşıl maliyyə"nin inkişafından danışan S.Durrani-Camal qeyd edib ki, AİB Azərbaycan Mərkəzi Bankına müvafiq çərçivənin hazırlanması və inkişafı istiqamətində dəstək göstərib. Bu yanaşmanın kommersiya banklarında da tətbiqi "yaşıl layihə"lərin maliyyələşdirilməsi üçün əlavə imkanlar yaradır.
O, həmçinin Maliyyə Nazirliyinin kapital bazarlarının inkişafına dəstək verəcək "yaşıl istiqraz"lar çərçivəsi üzərində işlədiyini bildirib.
S.Durrani-Camalın sözlərinə görə, İqtisadiyyat Nazirliyi dövlət-özəl tərəfdaşlığı (PPP) mexanizmləri vasitəsilə günəş enerjisi layihələrinin həyata keçirilməsində mühüm rol oynayır.
“Uğurun əldə olunması üçün tərəfdaşlıqlar olduqca vacibdir. Bu, dövlət və özəl sektor, hökumətlər və istehlakçılar, eləcə də indiki və gələcək nəsillər arasında əməkdaşlığı əhatə edir”, – deyə AİB rəsmisi vurğulayıb.
O əlavə edib ki, Azərbaycanın 2035-ci il üçün müəyyən etdiyi emissiyaların azaldılması hədəfinə nail olmaq üçün investisiyaların artırılması, yeni texnologiyaların tətbiqi və bütün maraqlı tərəflərin koordinasiyalı fəaliyyəti vacibdir.
