Bakı. Trend:
Azərbaycanda indiyə qədər maye və təbii qaz təsərrüfatı obyektlərinin quraşdırılması və istismarı ilə bağlı sahibkarlara verilən lisenziyaların sayı məlum olub.
Trend Prezident yanında Antiinhisar və İstehlak Bazarına Nəzarət Dövlət Agentliyinə istinadən xəbər verir ki, sözügedən işlərin icrası ilə bağlı 83 sahibkara lisenziya verilib.
Bildirilib ki, ərazi planlaşdırılması aparılmamış ərazilərdə qaz təchizatı üçün layihələndirmə və tikinti obyektlərindən qazpaylayıcı şəbəkənin qoşulma nöqtəsinədək tikinti- quraşdırma işləri istehlakçının seçdiyi podratçı və ya qaz paylayıcısı tərəfindən istehlakçının vəsaiti hesabına həyata keçirilir.
Tikinti-quraşdırma işlərinin dəyəri istehlakçı ilə podratçı arasında razılaşmaya əsasən təyin olunur.
Qeyd olunub ki, tikinti-quraşdırma işlərinin istehlakçı ilə podratçı arasında bağlanılan müqavilə əsasında həyata keçirilməsi və ödənişlərin podratçının bank hesabına (o cümlədən POS- terminal vasitəsilə) ödənilməsi zəruri hesab edilir.
Tikinti-quraşdırma işləri üzrə tərəflərin hüquq və vəzifələri, habelə mövcud qanunvericilik aktları ilə müəyyən edilən öhdəlikləri istehlakçılar ilə podratçı arasında bağlanılan müqavilə ilə tənzimlənir və hüquqları pozulan tərəfin digər tərəfə iddiası məhkəmə qaydasında həll olunur.