Bakı. Trend:
UEFA Prezidenti Aleksander Çeferin futbol üzrə dünya çempionatının final mərhələsində komanda sayının artırılması ideyasını dəstəkləmədiyini bildirib.
Trend xəbər verir ki, UEFA rəhbəri bu təklifin məqsədəuyğun olmadığını vurğulayıb.
"Dünya çempionatında komanda sayının 64-ə yüksəldilməsi heç də yaxşı ideya deyil və bunu dəstəkləmirəm. Bu təklif haradan ortaya çıxıb, bilmirəm. Bu, məni çox təəccübləndirdi. Həm dünya çempionatı, həm də seçmə mərhələ üçün uğursuz ideyadır. Üstəlik, bu barədə FIFA rəsmilərinin açıqlamalarından əvvəl heç bir məlumatımız yox idi", – deyə Çeferin bildirib.
Qeyd edək ki, dünya çempionatının 100 illiyi münasibətilə 2030-cu ildə keçiriləcək mundialda komanda sayının 48-dən 64-ə yüksəldilməsi variantı müzakirəyə çıxarılıb. FIFA Prezidenti Canni İnfantino isə bu ideyanın hərtərəfli təhlilə ehtiyacı olduğunu qeyd edib.