Bakı. Trend:
Azərbaycan və Avropa Yenidənqurma və İnkişaf Bankı (AYİB) arasında hazırda icra olunan və icrası planlaşdırılan layihələr müzakirə olunub.
Bu barədə Trend-ə Maliyyə Nazirliyindən məlumat verilib.
Belə ki, Azərbaycan Respublikasının maliyyə naziri Sahil Babayev Avropa Yenidənqurma və İnkişaf Bankının (AYİB) Davamlı İnfrastruktur Qrupunun idarəedici direktoru Harri Boyd-Karpenterin rəhbərlik etdiyi nümayəndə heyətini qəbul edib.
Azərbaycanın AYİB-lə əlaqələrin inkişafına böyük əhəmiyyət verdiyini vurğulayan nazir S.Babayev qeyd edib ki, ölkəmizdə bankın maliyyə dəstəyi ilə həm dövlət, həm də özəl sektorda bir sıra layihələr həyata keçirilib, iqtisadiyyatın şaxələndirilməsi, ictimai infrastrukturun inkişafı və yaşıl enerji layihələrinin tətbiqi genişlənib.
Görüşdə hazırda icra olunan və icrası planlaşdırılan layihələr üzrə də fikir mübadiləsi aparılıb.
Öz növbəsində H.Karpenter AYİB-nin Azərbaycan üzrə 2025-2030-cu illəri əhatə edən ölkə tərəfdaşlıq strategiyasının yeni təsdiq edildiyini qeyd edərək, strategiyanın Azərbaycanın milli inkişaf məqsədləri ilə uyğun olduğunu bildirib.
Azərbaycanla uzunmüddətli və səmərəli tərəfdaşlığını qeyd edən AYİB rəsmisi bankın bundan sonra da Azərbaycan iqtisadiyyatını dəstəkləməkdə davam etmək niyyətini, bu baxımdan ölkəmizin iqtisadi potensialının əlaqələrin genişlənməsinə əlavə imkanlar yaratdığını qeyd edib.