Bakı. Trend:
Siyəzən rayon əhalisi fasiləsiz və keyfiyyətli içməli su ilə təmin olunur.
Bu barədə Trend-ə Azərbaycan Dövlət Su Ehtiyatları Agentliyindən (ADSEA) məlumat verilib.
Bildirilib ki, bu işlər Agentliyin tabeliyində olan Siyəzən Su Meliorasiya Sistemlərinin İstismarı idarəsi tərəfindən həyata keçirilir. İçməli su sahəsi üzrə 8632 abonentə xidmət göstərilir ki, bunun da 8302 abonenti əhali, 330 abonenti isə qeyri əhalidir.
Ötən il ərzində mənbədən 2563875 m3 içməli su götürülüb və götürülən suyun 1930792 m3-i su istehlakçılarına verilib. Rayonda içməli su təchizatı və kanalizasiya şəbəkəsi üzrə baş verən bütün qəzalar idarənin qəza bərpa briqadası tərəfindən aradan qaldırılır. Bu istiqamətdə 425 içməli su, 650-si isə kanalizasiya şəbəkəsi olmaqla cari təmir işləri aparılıb. Hazırda bu istiqamətdə işlər davam edir.
Siyəzən Su Meliorasiya Sistemlərinin İstismarı İdarəsi meliorasiya sahəsi üzrə 2032 abonent olmaqla 12137 ha suvarılan əraziyə xidmət göstərir. Bunun üçün idarənin balansında 247 km-ə yaxın açıq suvarma kanalı mövcuddur ki, ondan 222 km torpaq məcralı, 24 km-i beton üzlüklüdür. Balansda 3 km-dən artıq boru, 199 km qapalı şəbəkə, 147 km isə kollektor-drenaj şəbəkəsi mövcuddur.
2025-ci il üzrə idarənin qarşıya qoyduğu vəzifələr olaraq torpaq məcralı kanalların beton üzlüyə alınması nəzərdə tutulur. Bununla yanaşı idarə sel və daşqınlara qarşı da tədbirlərini davam etdirir. Rayon ərazisindən axan çay məcralarında ekskovator və buldozerlərlə çay məcralarının tənzimlənməsi mütəmadi olaraq aparılır.
Qeyd edək ki, cari il ərzində Siyəzən rayonunda 5771 ha kənd təsərrüfatı bitkiləri əkilib ki, bundan 2600 ha taxıl , 1699 ha biçənək, 292 ha yonca, 85 ha tərəvəz-bostan, 13 ha dən üçün qarğıdalı, 785 ha bağ-meşə və 296 ha həyətyanı sahələrdir. Ümumilikdə 12552 hektar sahə suvarılıb və əkin sahələrinin orta suvarılma sayı 2,2 dəfə olub.
