Bakı. Trend:
Tovuzda beşmərtəbəli yaşayış binasında baş verən yanğın zamanı xəsarət alanların vəziyyəti məlum olub.
TƏBİB-dən Trend-in sorğusuna cavab olaraq bildirilib ki, 04.04.2025-ci il tarixində saat 13:00 rədələrində Tovuz Rayon Mərkəzi Xəstəxanasının Təcili yardım şöbəsinə tüstüdən zəhərlənmə diaqnozu ilə 9 nəfər (5-i kişi, 4-ü qadın cinsli olmaqla) hospitalizasiya edilib.
"Onlardan üçü azyaşlıdır. Xəstələrə zəruri tibbi yardım göstərilib. 1 nəfərin vəziyəti orta ağır, digərlərinin vəziyyəti isə kafi qiymətləndirilir",- deyə məlumatda qeyd edilib.
XXX
13:35
Tovuzda beşmərtəbəli yaşayış binasında yanğın olub.
Trend xəbər verir ki, bu barədə Fövqəladə Hallar Nazirliyi məlumat yayıb.
Bildirilib ki, Tovuz şəhəri, Vaqif küçəsində beşmərtəbəli yaşayış binasında yanğın baş verib. FHN-in Dövlət Yanğından Mühafizə Xidməti Tovuz rayon Yanğından Mühafizə Hissəsinin qüvvələri əraziyə cəlb edilib.
Yanğınsöndürənlərin çevik müdaxiləsi sayəsində binanın birinci mərtəbəsində yerləşən mənzildə baş vermiş yanğın qısa müddətdə södürülüb.
Qeyd edilib ki, yanğın nəticəsində ümumi sahəsi 50 kv.m. olan üçotaqlı mənzilin yanar konstruksiyaları yanıb, qonşu mənzillər yanğından mühafizə olunub.
Yanğın zamanı köməksiz vəziyyətdə qalmış 4 nəfər bina sakini yanğınsöndürənlər tərəfindən xilas olunub, 7 nəfər təhlükəsiz əraziyə təxliyə edilib, xəsarət almış 1 nəfər isə təcili tibbi yardım briqadasına təhvil verilib.