Bakı. Trend:
bp direktorlar şurasının sədri Helqe Lund tutduğu vəzifədən istefa verəcəyini elan edib.
Trend xəbər verir ki, bu haqda onun mətbuat üçün yaydığı pres-relizdə deyilir.
“Strategiyamızı əsaslı şəkildə yenidən müəyyən etdikdən sonra, bp-nin əsas diqqəti hazırda bu strategiyanı sürətlə həyata keçirməyə, fəaliyyət nəticələrini yaxşılaşdırmağa və səhmdar dəyərini artırmağa yönəlib. İndi mənim varisimi tapmaq və vəzifənin nizamlı və fasiləsiz təhvilini təmin etmək üçün prosesə başlamaq üçün doğru zamandır”, - deyə o bildirib.
Lund keçmiş baş direktor Bernard Luninin rəhbərliyi ilə 2020-ci ildə qəbul edilən və bp-nin neft və qazdan uzaqlaşmasına yönəlmiş “yaşıl” strategiyasını dəstəkləmişdi. Bu plan 2030-cu ilə qədər karbohidrogen istehsalını 40% azaltmağı hədəfləyirdi. Lakin bp-nin səhmlərinin dəyəri “Shell” və “Exxon” kimi rəqiblərlə müqayisədə zəif nəticə göstərib.
bp direktorlar şurası artıq yeni sədrin seçilməsi üçün namizədləri nəzərdən keçirməyə başlayıb.
Lund direktorlar şurasından “böyük ehtimalla, 2026-cı ildə” ayrılacağını bildirib.
“Səlahiyyətlərin ötürülməsi dövründə Direktorlar Şurası şirkətin yeni strategiyasının menecment tərəfindən həyata keçirilməsinə diqqət yetirəcək və bu, yeni sədrin rəhbərliyi altında da əsas prioritet olaraq qalacaq”, – deyə mətbuat relizində bildirilir.
Norveçdən olan Lund 2019-cu ildə bp-ə rəhbərlik edirdi.
Qeyd edək ki, ötən il bp səhmləri 20.9% ucuzlaşıb.