Bakı. Trend:
Qazaxıstan, Özbəkistan və Azərbaycanla birgə Xəzər dənizi üzərindən “yaşıl” enerjinin ötürülməsi xəttinin tikintisini nəzərdə tutan genişmiqyaslı layihənin icrasına başlayır. Bu layihə nəticəsində enerji Avropa bazarlarına çıxarılacaq.
Trend xəbər verir ki, bunu Qazaxıstanın prezidenti Kasım-Jomart Tokayev Səmərqənddə keçirilən “Mərkəzi Asiya-Avropa İttifaqı” zirvə toplantısında etdiyi çıxışda deyib.
Çıxışında Tokayev Mərkəzi Asiya ilə Avropa İttifaqı arasında gələcək əməkdaşlığın gündəliyinə dair öz baxışını sammit iştirakçılarına təqdim edib.
Prezident Tokayev hesab edir ki, əsas diqqət ticarət-iqtisadi əlaqələrin möhkəmləndirilməsinə yönəldilməlidir. Onun sözlərinə görə, Qazaxıstan Avropa İttifaqına 175 mal kateqoriyası üzrə 2 milyard dollardan artıq məbləğdə ixracı artırmağa hazırdır.
Belə layihələrin maliyyələşdirilməsi üçün Qazaxıstan prezidenti Avropa şirkətlərini “Astana” Beynəlxalq Maliyyə Mərkəzinin platformasından istifadə etməyə çağırıb.
“Qazaxıstan Avropanın etibarlı karbohidrogen tədarükçüsü olaraq qalır. Ölkəmiz Avropa İttifaqının neft idxalının təxminən 13%-ə cavab verir və bu idxalın əsas hissəsi Xəzər Boru Kəməri Konsorsiumu (KTK) vasitəsilə həyata keçirilir. Biz Avropa İttifaqının bu konsorsiumun sabit və uzunmüddətli fəaliyyətinin təmin olunmasına, eləcə də, xammalın nəqli üçün alternativ marşrutların işlənib hazırlanmasına yönəlmiş dəstəyini yüksək qiymətləndiririk.
Qazaxıstan bərpa olunan enerji mənbələri və ekoloji cəhətdən təmiz yanacaq növləri sahəsində layihələr həyata keçirir. Biz külək və günəş enerjisi potensialını artırır, eyni zamanda, uzunmüddətli tərəfdaşlarımız “Total”, “Eni”, “Svevind” və digər Avropa şirkətləri ilə əməkdaşlıq çərçivəsində “yaşıl” hidrogen istehsalı üzrə layihələri inkişaf etdiririk”, - deyə Kasım-Jomart Tokayev vurğulayıb.
Sonda Kasım-Jomart Tokayev tədbir iştirakçılarına və Avropa tərəfdaşlarına Mərkəzi Asiya və Əfqanıstan üçün Dayanıqlı İnkişaf üzrə BMT-nin Regional Mərkəzinin Almatıda yaradılması təşəbbüsünə göstərdikləri dəstəyə görə təşəkkürünü bildirib.Onun fikrincə, bu mərkəz universal “2030 Gündəliyi”nin irəliləməsinə effektiv şəkildə töhfə verəcək və regionun aktual sosial, iqtisadi və ekoloji problemlərinin həllinə kömək edəcək.
Qeyd edək ki, bu gün Səmərqənddə (Özbəkistan) “Mərkəzi Asiya – Avropa İttifaqı” sammiti keçirilib. Bu sammit Mərkəzi Asiya ölkələri (Qazaxıstan, Qırğızıstan, Tacikistan, Türkmənistan, Özbəkistan) ilə Avropa İttifaqı arasında əməkdaşlıq məsələlərinin müzakirə olunduğu mühüm diplomatik görüşdür. Belə sammitlər adətən iki region arasında siyasi, iqtisadi və mədəni əlaqələrin möhkəmləndirilməsi məqsədilə təşkil olunur.