Bakı. Trend:
Dünən NARGIS jurnalının baş redaktoru Ülviyyə Mahmud Barselonadakı Casa Azerbaiyán evinin nümayəndəsi ilə birlikdə Barselona Musiqi Muzeyini (Museu de la Música de Barcelona) ziyarət edib və muzeyin direktoru Jordi Alomar i Payerasa Azərbaycan milli musiqi aləti olan kamançanı hədiyyə edib.
Trend xəbər verir ki, bu səfər 4 iyul tarixində başlanmış mədəni dialoqun davamı olub.
Həmin gün Azərbaycan Diasporuna Dəstək Fondunun dəstəyi ilə NARGIS jurnalı Barselonanın tarixi Palau Dalmases sarayında “Əlifba. A Cultural Alphabet” kitabının təqdimatına həsr olunmuş xüsusi gecə təşkil etmişdi.
Hədiyyə edilən kamança Azərbaycan Milli Konservatoriyasının Milli Musiqi Alətlərinin Təkmilləşdirilməsi və Bərpası üzrə Elmi-Tədqiqat Laboratoriyasının rəhbəri Məmmədəli Məmmədov tərəfindən hazırlanıb. Bu kamança Museu de la Música de Barcelona kolleksiyasına daxil edilən ilk Azərbaycan milli musiqi alətidir.
