Bakı. Trend:
SOCAR-ın qaz təchizatı sayəsində 2024-cü ildən Azərbaycanla daha da möhkəmlənən tərəfdaşlığımız Cənub Qaz Dəhlizi və İon-Adriatik boru kəməri kimi əsas layihələri dəstəkləyir.
Trend xəbər verir ki, bunu Xorvatiyanın İqtisadiyyat Nazirliyinin dövlət katibi Vedran Şpehar Cənub Qaz Dəhlizi Məşvərət Şurası çərçivəsində nazirlərin 11-ci və Yaşıl Enerji Məşvərət Şurası çərçivəsində nazirlərin 3-cü iclaslarında çıxışı zamanı deyib.
O bildirib ki, Xorvatiya 2050-ci ilə qədər Avropanın iqlim siyasətinə uyğun olaraq təmiz və əlverişli enerji və “yaşıl” iqtisadiyyata keçid hədəfinə sadiqdir: "REPowerEU proqramı sayəsində biz regional enerji mərkəzinə çevrilir, mayeləşdirilmiş təbii qaz (LNG) terminalımızı 2026-cı ilə qədər 559 milyon avro investisiya ilə 6,1 milyard kubmetrə qədər genişləndirir, eləcə də Sloveniya və Macarıstanda yeni boru kəmərlərinin inşasına sərmayə qoyuruq".
"SOCAR-ın qaz təchizatı sayəsində 2024-cü ildən Azərbaycanla daha da möhkəmlənən tərəfdaşlığımız Cənub Qaz Dəhlizi və İon-Adriatik boru kəməri kimi əsas layihələri dəstəkləyir", - V. Şpehar vurğulayıb.