Bakı. Trend:
2026-cı ilin mart ayında SOCAR-ın Türkiyədəki STAR neft emalı zavodunun istehsal strukturunda dəyişiklik baş verib: dizel yanacağı istehsalının illik ifadədə azalması fonunda reaktiv yanacaq, nafta və mayeləşdirilmiş karbohidrogen qazı (LPG/ MKQ) istehsalı artırılıb.
Bu barədə Trend Türkiyənin Enerji Bazarının Tənzimlənməsi Qurumunun (EPDK) məlumatlarına istinadən xəbər verir.
Məlumata əsasən, STAR NEZ-də 2026-cı ilin mart ayında dizel yanacağı istehsalı 2025-ci ilin eyni ayındakı 586 999 tonla müqayisədə 539 299 ton təşkil edib ki, bu da təxminən 8,1 faiz azalma deməkdir.
Bioəlavəli dizel istehsalı da illik ifadədə azalaraq 10 952 tondan 8 301 tona düşüb, azalma təxminən 24,2 faiz təşkil edib.Digər yandan, reaktiv yanacaq istehsalı kəskin artaraq 2025-ci ilin martındakı 116 979 tonla müqayisədə 2026-cı ilin martında 184 598 tona çatıb ki, bu da təxminən 57,8 faiz artım deməkdir.
Vakuum qazoylu istehsalı ötən ilin eyni dövründəki 11 433 tondan 227 tona enib. MKQ istehsalı isə artaraq 2025-ci ilin martındakı 21 200 tonla müqayisədə 30 048 ton olub, artım təxminən 41,7 faiz təşkil edib.
Nafta istehsalı da artaraq 129 626 tondan 145 560 tona yüksəlib ki, bu da təxminən 12,3 faiz artıma uyğundur. Neft koksu istehsalı isə 65 247 tondan 71 071 tona çatıb, artım təxminən 8,9 faiz olub.
EPDK qeyd edir ki, hesabat dövründə zavod digər neft məhsullarının istehsalını da davam etdirib.
Qeyd edək ki, 2018-ci ilin oktyabrında istismara verilmiş STAR NEZ neft emalı və neft-kimya sahələrini inteqrasiya edir və Türkiyənin real sektorunda ən böyük investisiya layihəsi hesab olunur.
