Bakı. Trend:
Qarşıdakı dövrdə Serbiyada qaz əsaslı istilik elektrik stansiyasının (İES) tikintisi üzrə layihənin həyata keçirilməsi ilə Azərbaycanla strateji tərəfdaşlığımızının dərinləşəcəyini gözləyirik.
Trend xəbər verir ki, bunu Serbiyanın Mədən və Energetika Nazirliyində neft və qaz üzrə nazir müavininin vəzifəsini icra edən Saşa Kokoviç Cənub Qaz Dəhlizi Məşvərət Şurası çərçivəsində nazirlərin 11-ci və Yaşıl Enerji Məşvərət Şurası çərçivəsində nazirlərin 3-cü iclaslarında çıxışı zamanı deyib.
O bildirib ki, uzun müddət Avropaya qaz təchizatının şaxələndirilməsi üzrə həllin bir hissəsi kimi tanınan Azərbaycan qazı Serbiya-Bolqarıstan qaz interkonnektorunun tikintisi sayəsində həm Serbiyanın, həm də bütövlükdə regionun enerji təhlükəsizliyinin yüksəldilməsi üzrə həllin bir hissəsinə çevrilib: "Qarşıdakı dövrdə Serbiyada qaz əsaslı istilik elektrik stansiyasının tikintisi üzrə layihənin həyata keçirilməsi ilə Azərbaycanla strateji tərəfdaşlığımızının dərinləşəcəyini gözləyirik.
Bu da Cənub Qaz Dəhlizi ilə infrastruktur əlaqəsinə əsaslanır. Serbiya enerji təhlükəsizliyini və fasiləsiz tədarükü artıracaq müxtəlif təşəbbüs və layihələr çərçivəsində bölgəmizdəki ölkələrlə, eləcə də Mərkəzi Asiyadan olan tərəfdaşlarla əməkdaşlığa açıqdır”.