Bakı. Trend:
Almaniya Azərbaycanın Avropada ən vacib siyasi-iqtisadi tərəfdaşlarından biridir. İkitərəfli münasibətlərimizin tarixində Almaniya Prezidentinin Azərbaycana ilk dəfə rəsmi səfər etməsi xüsusi əhəmiyyət daşıyır. Prezident Frank-Valter Ştaynmayerin Azərbaycana səfəri həm də iki ölkə arasında etibarlı tərəfdaşlığın hərtərəfli və yüksələn xətlə inkişafının əyani göstəricisidir.
Bu fikirləri Trend-ə açıqlamasında Milli Məclisin deputatı Səbinə Salmanova deyib.
Deputat bildirib ki, Almaniya Azərbaycanın müstəqilliyini tanıyan ilk dövlətlərdən biridir:
“Diplomatik münasibətlərin yaranmasından sonra iki ölkə arasında əlaqələr mütəmadi olaraq inkişaf edib. Xalqlarımız arasında əlaqələrin də dərin tarixi kökləri var. XIX əsrdə bir sıra alman tayfaları Azərbaycan ərazisinə köçüb, burada üzümçülüyün və şərabçılığın inkişafında mühüm rol oynayıb, eləcə də, iqtisadiyyatın digər sahələrinin inkişafına böyük töhfə veriblər. Azərbaycan Xalq Cümhuriyyətinin parlamentində milli azlıq fraksiyasının 4 üzvündən biri almanəsilli Lorentz Kuntz olub. Hazırda da ölkəmizdə alman tarixi və mədəni irsinə böyük hörmətlə yanaşılır”.
S.Salmanova Azərbaycanla Almaniya arasında təhsil, səhiyyə, iqtisadiyyat, bərpaolunan enerji və digər sahələr üzrə əməkdaşlığın yüksələn xətlə inkişaf etdiyini diqqətə çatdırıb:
“Ölkəmizdə alman dilinə böyük maraq var. Alman dili bir sıra orta və ali təhsil müəssisələrində tədris olunmaqdadır. Bundan başqa, ölkələrimiz arasında səhiyyə sahəsində də əməkdaşlıq genişlənməkdədir. Hazırda Almaniyada tibb sahəsində təhsil alan xeyli tələbəmiz də vardır. Azərbaycan Almaniya şəhərləri arasında da əlaqələr inkişaf etdirilir. Bakı ilə Mayns, Sumqayıtla Lüdviqşafen şəhərləri “qardaşlaşıblar”.
Millət vəkili qeyd edib ki, Prezident Frank-Valter Ştaynmayerin bu səfəri zamanı keçirilən görüşlər, aparılan danışıqlar iki ölkə arasında münasibətlərin daha yüksək səviyyəyə qaldırılmasına əhəmiyyətli təkan verəcək, gələcək inkişaf üçün böyük perspektivlər açacaq.
Milli Məclisin deputatı, Azərbaycan-Almaniya Federativ Respublikası parlamentlərarası əlaqələr üzrə işçi qrupunun üzvü Asim Mollazadə isə Trend-ə açıqlamasında deyib ki, Azərbaycan-Almaniya münasibətlərində çoxşaxəli sistem tətbiq edilir:
“Söhbət iqtisadi, nəqliyyat, enerji sahələrində olan əməkdaşlıqdan gedir. Azərbaycan bu istiqamətdə Cənubi Qafqazın ən güclü ölkəsi kimi əməkdaşlığı genişləndirməyə hazırdır. Son vaxtlar bizim əməkdaşlığımız eyni zamanda "yaşıl enerji" sahəsinə də sirayət edir. Bu istiqamətdə gələcəkdə bir neçə layihənin həyata keçirilməsi nəzərdə tutulur”.
Millət vəkili vurğulayıb ki, Azərbaycan-Almaniya münasibətlərinin çox mühüm hissəsi humanitar sahədədir.
“Əməkdaşlığımız mədəniyyəti, təhsili əhatə edir, ilk növbədə tarixi əlaqələrə əsaslanır. Xatırlatmaq istərdim ki, vaxtında Almaniyanın ağır vəziyyətdə olan bir icması Azərbaycanda yaşayıb, burada müsbət şəraitlə təmin edilib. Bu əlqaələrin davam etdirilməsi bir ənənəyə çevrilməlidir.
Son vaxtlar Almaniya Azərbaycanda yeni investisiya layihələri həyata keçirməyi düşünür. Bu layihələr eyni zamanda Azərbaycanın işğaldan azad edilmiş ərazilərini də əhatə etməlidir. Ümidvarıq ki, bu münasibətlər daha sürətlə inkişaf edəcək”, - deyə A.Mollazadə fikrini yekunlaşdırıb.